कारोबारी प्रवीण सोमानी सकुशल वापिस, अपहरण के पाछू के जम्मों सच


कारोबारी प्रवीण सोमानी सकुशल वापिस, अपहरण के पाछू के जम्मों सच
  23/01/2020  


रायपुर ।। कारोबारी प्रवीण सोमानी अपहरणकांड के मामला म डीजीपी दुर्गेश माधव अवस्थी ह आधा रात के बाद प्रेसवार्ता करके जम्मों मामला के जानकारी दिहिस, डीजीपी बताईस कि छत्तीसगढ़ के इतिहास म राजधानी पुलिस बर ए एक बड़का कामयाबी हे, ए ह ठीक ओही तरह के कामयाबी हे जईसे दिल्ली अऊ मुंबई जईसे बड़े अऊ मेट्रो सिटी के पुलिस प्रोफेसनल तरीके से काम करथे, एसपी ह खुद मोर्चा संभालत हुए बहुत ही प्रभावी ढंग से ए मामला म सफलता हासिल करीस, जेन काबिले तारीफे हे।

ए मामला म राजधानी पुलिस बहुत धर्य पूर्वक काम करीस, कोनो भी प्रकार के जल्दबाजी म काम नई करे गईस, काबर कि एमा हमर पहला प्राथमिकता कारोबारी प्रवीण के सुरक्षा रहिस, मीडिया ह जेन प्रकार से ए मामला ल लेके संवेदनशीलता दिखाईस ओहू प्रंशसनीय हे, हम आरोपी मन के लगातार निगरानी करत रहेन, लेकिन हम जईसे पुख्ता हो गएन कि आरोपी मन प्रवीण ल कहां लुका के रखे हे तभे छापा मार के प्रवीण ल सकुशल बरामद करेन, ए मामला म मौका ले दू आरोपी ल गिरफ्तार घलोक करे गए हे

प्रवीण के अपहरण के पूरा प्लान यूपी बिहार नई बल्कि गुजरात म बने रहिस, गुजरात के सूरत जेल म, ए ओही जेल हे जिहां अपहरण के कुख्यात आरोपी पप्पू चौधरी अपन संगी मन संग बंद हे, ए घटना म पप्पू चौधरी मास्टर माईंड रहिस जेन ह बिहार के बड़का बदमाश चंदन सोनार बर काम करथे, ए प्लान म पप्पू के संघ 10 आरोपी घलोक शामिल हावे, एमा 4 आरोपी गुजरात के रहवईया हे जबकि 6 आरोपी यूपी बिहार के हे फिलहाल ए मामला म पुलिस अभी दू आरोपी के गिरफ्तारी के बात करत हे जबकि पप्पू समेत बाकि के 8 आरोपी अभी फरार बताए जात हे

बड़का बात ए रहिस कि ए हाई प्रोफाईल अपहरण कांड ल खुद पुलिस अधिक्षक आरिफ शेख लीड करत रहीस, अऊ खुद यूपी जाके ए पूरा मामला के मोर्चा ल संभाले रहिस, ओ ह लगातार आरोपी मन से मिले सुराग उपर काम करत रहिस, कुशल रणनीति अऊ सूराग के आधार म अपन टीम संग मौका म छापा मार कारोबारी ल सकुशल वापस लाईस अऊ दू आरोपी ल धर दबोचिस

रायपुर ले नवीन देवांगन के ख़बर


अऊ खबर

img not found

06/09/2020 अपराध

img not found

21/11/2019 धान

Top