हरेली तिहार विशेष : बढ़िया फसल के कामना अउ प्रकृति के पूजा करे के पर्व : हरेली


हरेली तिहार विशेष : बढ़िया फसल के कामना अउ प्रकृति के पूजा करे के पर्व : हरेली
  20/07/2020  


 

केशव पाल रायपुर । संस्कृति अउ परंपरा देश के पहचान होथे,मन के भाव अउ उल्लास जब सहज रूप ले अभिव्यक्त होथे तब मानव-मानव के बीच के भेद दूरिहा जथे अउ तब जिनगी के हरहर-कटकट ले दूर होके मानव इही तीज-तिहार के माध्यम ले अपन उन्मुक्त खुशी के इजहार करथे। छत्तीसगढ़ म बारहों महिना अनेक तीज-तिहार मनाय जाथे। शायद इही कारण येला तीज-तिहार के राज्य कहे जाथे। उही म एक हे हरेली तिहार। हरेली छत्तीसगढ़ के पहला तिहार आय। हरेली छत्तीसगढ़ी शब्द आय जेकर हिन्दी अर्थ हरियाली होथे। सावन महिना के कृष्ण पक्ष अमावस्या के दिन ये तिहार ल छत्तीसगढ़ म बड़ श्रद्वा अउ उल्लास के संग मनाय जाथे। हरेली अच्छा फसल के कामना के संग प्रकृति के पूजा करे के पर्व आय। वर्ष भर फसल अच्छा होय ये खातिर ये दिन किसान मन कृषि यंत्र अउ गाय,बैला मन के पूजा करथे।

●कुल देवी-देवता के पूजा●

हरेली के दिन किसान मन अपन ग्राम देवता अउ कुल देवी-देवता के विधि-विधान ले पूजा अर्चना करथे। अउ सुख समृद्धि के कामना करथे। ग्रामीण क्षेत्र मन म ये दिन दिनभर कई कार्यक्रम के आयोजन घलो करे जाथे।

●कृषि उपकरण मन के पूजा●

हरेली तिहार के दिन खेती किसानी के काम पूरा तरीका ले बंद रहिथे। ये दिन किसान मन जम्मो कृषि औजार नांगर,गैंती,रांपा,कुदारी,फावड़ा,आरी,साबर मनके साफ-सफाई कर येमन ल एक जघा मढा के येकर मन के पूजा करथे। संगे-संग गाय,बैला मन ल बीमारी ले बचाय बर येमन ल बरगंडा अउ नमक खवाय जाथे अउ येकर मन के पूजा-अर्चना करे जाथे।

●लोहार के महत्व●

हरेली के दिन लोहार मन घर के चौखट म खीला ठेंस के सुख-समृद्धि के कामना करथे वोकर बदला म किसान मन लोहार मन ल अपन उचित के दान देथे। ये दिन दरवाजा म नीम पत्ता घलो टांगे जाय के परंपरा हे ताकि लोगन मन सुरक्षित राहय।

●गेड़ी के मजा●

ये दिन लइका मन टोली बनाके बाँस के गेंड़ी बनाके खूब मजा लेथे। कई जगह गेंड़ी दौड़ के आयोजन घलो करे जाथे। त कहूँ-कहूँ नारियल फेक के आयोजन घलो ये दिन करे जाथे।

●छत्तीसगढ़ी पकवान के मजा●

हरेली तिहार के दिन घरो-घर गुड़ के चीला बनाय जाथे। अउ येला कृषि यंत्र मन म भोग के रूप म चढा़य जाथे। संगे-संग खुरमी,ठेठरी,अइरसा,सहित अउ कई पकवान घलो ये दिन बनाय के परंपरा चले आवत हे।


अऊ खबर

img not found

06/09/2020 अपराध

img not found

05/12/2019 this is test news22

img not found

21/11/2019 धान

Top