कोरिया : जलाशय बांध फूटे ले फसल हुईस बर्बाद


कोरिया : जलाशय बांध फूटे ले फसल हुईस बर्बाद
  23/09/2020  


कोरिया : जिला के क्षेत्र म बीते कई दिन ले लागातार बारिश जारी हे, जेकर चलत बैकुंठपुर तहसील म बने खाड़ा जलाशय बांध के इक बड़का हिस्सा बीच ले फूट गए। बांध म लबालब भरे पानी खाड़ा बांध ले निकर के, कई गांव म लगे फसल ल चौपट करत सिलफोटवा बांध म पानी भरे लगिस, खाड़ा जलाशय बांध के फूटे ले ग्रामीणजन म दहशत बने हे। आज बिहाने खाड़ा म बांध फूटे के खबर आग जइसे क्षेत्र म फैलिस, जेकर बाद काफी संख्या म ग्रामीण बांध देखे बर पहुंचिन। वहें बैकुंठपुर ले खाड़ा जाए वाला मार्ग म बने पुलिया के उपर ले पानी बहे लगिस। गांव के लोग भी बताईन कि ओ ह पहिल बेरा ये तरह ले बांध के टूटत देखे हवें, बांध टूट जाए ले उनकर खड़े फसल ल बड़ाका नुकसान पहुंचे हे।

ग्रामीणजन ल बताइन कि बीेते तीन दिना ले बांध के बीचोंबीच म पानी के रिसाव होवत रहिस,ऐकर जानकारी जल संसाधन विभाग के अधिकारी मन ल दिहे गए रहिस, तब्बो ले विभाग कोनों ध्यान नहीं दिहिस। वहें ये बांध के ओवर पानी निकासी वेस्ट वेयर ले, जुलाई म ही शुरू हो गए रहिस, बांध म ज्यादा पानी भरे होय के बाद विभाग जलाशय कती देखे के जरूरत नहीं समझिस। एही कारण पानी के दबाव बढत गय अउ आज बांध बीच ले टूट गय। यदि विभाग ले पंद्रह दिना पहिले बांध के दूनू गेट खोल दिए होवत तो बांध ल बचाय जा सकत रहिस।

 

खाड़ा जलाशय बांध म दू बड़े गेट हवे, नियम ले बांध के फूटे ले बचाय खातिर गेट ल खोल दिए जावत हे, विभाग के अधिकारी समय रहत गेट खोले के पहल नहीं करिन। बांध टूटे के सबले बड़े वजह ऐही बताए जा रहे हे। गांव के लोगन के कहना हे कि बांध के दूनों गेट खराब रहिस,बोरी म रेत भरके बंद करे गय रहिस।बांध के फूटे ले करीब दू दर्जन गांव के किसान आपन खड़े फसल ल बर्बाद होवत देखत रहिगे,मौका उपर पहुंचें जल संसाधन विभाग के अधिकारी बांध फूट जाए के नजारा देखत नजर आईन। जइसे ही बांध फूटे के खबर गांव म फइलिस तो काफी संख्या म ग्रामीण बांध के तीर पहुंचके कई घंटा मछली पकड़े म लगे रहिन।

 

बांध फूटे के जानकारी मिले के बाद बैकुंठपुर विधायक व संसदीय सचिव अंबिका सिंहदेव राज्य के जल संसाधन मंत्री ल मामला के पूरा जानकारी दिहिन, इकर अलावा जिला प्रशासन के जल्द से जल्द किसानन के बर्बाद होय फसल के मूल्यांकन कर मुआवजा दिहे जाय के कहिन,मामले म विभाग ले होय लापरवाही के जांच कर कार्यवाही के निर्देशित करिन।


अऊ खबर

img not found

06/09/2020 अपराध

img not found

05/12/2019 this is test news22

img not found

21/11/2019 धान

Top