सरकारी कोष ले भुगतान के मांग बर चिटफंड निवेशक मन दिहिन धरना,प्रदेश भर ले अभिकर्ता अउ निवेशक मन होइन शामिल


सरकारी कोष ले भुगतान के मांग बर चिटफंड निवेशक मन दिहिन धरना,प्रदेश भर ले अभिकर्ता अउ निवेशक मन होइन शामिल
  11/10/2020  


केशव पाल रायपुर। छ.ग.नागरिक अधिकार समिति के नेतृत्व म चिटफंड के ठगी के शिकार निवेशक मन वायदा निभाओ दिवस मनावत हुए प्रदेश सरकार ले तत्काल सरकारी कोष ले दावेदार मन के रकम भुगतान के मांग करिन। बूढ़ापारा धरना स्थल म आयोजित धरना म प्रदर्शनकारी मन कहिन कि कंपनी मन के संपत्ति मन ल जब्त कर निवेशक मन ल भुगतान करे के प्रक्रिया अतका लंबा अउ पेचीदा हे कि 5 साल के कार्यकाल म 20 लाख निवेशक मन के भुगतान करे जाना संभव नइ हे। येकर सेती सरकार पहिली अपन कोष ले निवेशक मन के भुगतान कर देवय फेर बाद म कंपनी मन के संपत्ति बेचके अपन खजाना भरत रहि। समिति के प्रदेश अध्यक्ष शुभम साहू ह सभा ल संबोधित करत कहिस कि सरकार अपन चुनावी वायदा ल पूरा करे के दिशा म बिल्कुल भी गंभीर नइ हे। अधिकांश कंपनी मन के प्रकरण हाई कोर्ट अउ सुप्रीम कोर्ट म लंबित हे येकर सेती वोकर संपत्ति ल नीलामी करना संभव नइ हे। वर्तमान म सरकार द्वारा प्रस्तुत योजना ले बहुत कम मात्रा म निवेशक लाभान्वित होही। येकर कारण सरकार एक विशेष फंड के प्रावधान कर निवेशक मन के भुगतान शुरू करय। येकर संगे-संग फरार संचालक मन के गिरफ्तारी करे बर,अभिकर्ता मन के खिलाफ दर्ज प्रकरण ल वापस ले बर अउ थाना मन म अभिकर्ता मन ल प्रताड़ित नइ करे के मांग घलो करिस। आखिरी म रायपुर तहसीलदार दीपक भारद्वाज ल मुख्यमंत्री के नाम 6 सूत्रीय ज्ञापन सौंप के शीघ्र कदम नइ उठाय जाय के स्थिति म आंदोलन के विस्तार करे के चेतावनी देहे गइस। आंदोलन के नेतृत्व शुभम साहू,राजेश पराते,मनीष पटेल, प्रीतिश तिवारी,गोपी निषाद,रविन्द्र कुमार साहू,भुवनेश्वर उपाध्याय,तिजू साहू,राजेन्द्र वर्मा, जे.आर. कश्यप,मोहन पटेल,रत्ना गिलहरे,चांदनी पात्रे अउ डाकेश्वर कुमार साहू द्वारा करे गइस। आंदोलन म मूलचंद साहू,दिलेश्वर ध्रुव,साधुराम यादव,विजय कुमार साहू,गीता बाई साहू, लेखराम देशमुख,नरेश साहू,मोहन तम्बोली, विकास तम्बोली, कोमेश साहू, जगन्नाथ यादव, डोमन साहू, पंचराम वर्मा,सुरेश कुमार,बेनीराम वर्मा,जितेश साहू, रायपुर,दुर्ग,भिलाई,राजिम,बिलासपुर,राजनांदगांव,धमतरी सहित प्रदेश भर ले अभिकर्ता अउ निवेशक मन हिस्सा लिन। अउ धरना के आखिरी म घोषणा करे गइस कि छ.ग.नागरिक अधिकार समिति प्रदेशभर म ए मुद्दा म बैठक के आयोजन कर अभिकर्ता अउ निवेशक मन ल संगठित कर बड़े आंदोलन के तैयारी करही।


अऊ खबर

img not found

06/09/2020 अपराध

img not found

21/11/2019 धान

Top