पंचायत सचिव अउ रोजगार सहायक हड़ताल म, पंचायत कामकाज ठप


पंचायत सचिव अउ रोजगार सहायक हड़ताल म, पंचायत कामकाज ठप
  12/01/2021  


केशव पाल @ तिल्दा-नेवरा। पंचायत सचिव अउ रोजगार सहायक मन ये दिनों अपन मांग ल लेके अनिश्चितकालीन धरना म बैठे हे। जेकर कारण पंचायत के जम्मो कामकाज ठप पड़ गेहे। एक कोती जिहां पंचायत सचिव अउ रोजगार सहायक मन अपन-अपन मांग ल पूरा कराय बर धरना प्रदर्शन करत हे। त उंहे दूसर कोती शासन-प्रशासन मौन साधे हे। पंचायत सचिव मन ल आज 17 वां दिन त उंहे रोजगार सहायक मन ल 13 वां दिन होगे हड़ताल करत। तभो ले ओकर मन के मांग पूरा होवत नइ दिखत हे।ये बताना लाजिमी हे कि पंचायत सचिव अउ रोजगार सहायक मन काम बंद कलम बंद हड़ताल करत हे। लेकिन सरकार के कान म जूं तक नइ रेंगत हे। प्रदेश के 146 जनपद के धरनास्थल म प्रदेश पंचायत सचिव संघ के प्रान्तीय आह्वान म सचिव संघ के एक सुत्रीय मांग 2 वर्ष परीविक्षा अवधि पश्चात सचिव मन के शासकीयकरण अउ रोजगार सहायक संघ ग्रेड पे निर्धारण कर नियमितीकरण के मांग करत हे। तिल्दा जनपद परिसर म घलो ब्लॉक के सब्बो सचिव अउ रोजगार सहायक मन अपन मांग ल लेके धरना प्रदर्शन करत हे। मगर शासन-प्रशासन तरफ ले कोनो भी प्रकार के जवाब नइ आवत हे।

भैंस के आघू बिन बजाके करिन प्रदर्शन

अपन मांग ल राज्य शासन के कान तक पहुंचाय बर आज पूरा छत्तीसगढ़ प्रदेश म हड़तालरत सचिव अउ रोजगार सहायक मन भैंस के आघू बिन बजाके नारेबाजी करत जमके विरोध प्रदर्शन करिन। जनपद पंचायत परिसर तिल्दा धरनास्थल म घलो भैंस के आघू बिन बजाके विरोध प्रदर्शन करे गइस। संगे-संग 12 जनवरी ले ओमन क्रमिक भूख हड़ताल घलो करही। अउ परिवार सहित बैठ के उग्र प्रदर्शन करही।

पंचायत कामकाज ठप

सचिव अउ रोजगार सहायक मन के हड़ताल म जाय ले पंचायत के जम्मो कामकाज पूरा तरीका ले ठप पड़ गेहे। येकर असर निर्माण कार्य म पड़त हे। पंचायत के बैठक नइ हो पावत हे। इही कारण नवा कार्य घलो स्वीकृत नइ हो पावत हे। सरकार के योजना म घलो हड़ताल के असर दिखत हे। काबर कि सचिव मन ही ये कार्य के मॉनिटरिंग करथे। निर्माण कार्य के भुगतान घलो रूक गेहे।

जारी रइही हड़ताल

धरना देवत ब्लॉक के सचिव अउ रोजगार सहायक मन के साफ कहना हे कि ये हड़ताल अनिश्चितकालीन आय। अउ जब-तक ओकर मन के मांग पूरा नइ होही तब-तक ओमन हड़ताल म डटे रइही।  

 


अऊ खबर

img not found

06/09/2020 अपराध

img not found

05/12/2019 this is test news22

img not found

21/11/2019 धान

Top