विमोचन : अभिनंदन ग्रंथ ' जागरण दूत जागेश्वर ' के विधानसभा अध्यक्ष डॉ.महंत ह करिन विमोचन


विमोचन : अभिनंदन ग्रंथ ' जागरण दूत जागेश्वर ' के विधानसभा अध्यक्ष डॉ.महंत ह करिन विमोचन
  24/01/2021  


केशव पाल @ रायपुर। छत्तीसगढ़ राज्य निर्माण,छत्तीसगढ़ी राजभाषा निर्माण अउ छत्तीसगढ़ी पत्रकारिता के पुरोधा जागेश्वर प्रसाद के व्यक्तित्व अउ कृतित्व ऊपर आधारित अभिनंदन ग्रंथ ' जागरण दूत जागेश्वर ' के छत्तीसगढ़ विधानसभा अध्यक्ष डॉ.चरण दास महंत के द्वारा विमोचन करे गइस। डॉ.महंत के निवास म आयोजित ये कार्यक्रम के मुख्य अतिथि डॉ.चरण दास महंत ह जागेश्वर प्रसाद ल बधाई देवत कहिन कि ओकर योगदान अतुलनीय हे। आप सब के सहयोग अउ प्रयास ले छत्तीसगढ़ी ल आठवीं अनुसूची म शामिल करवाबो।अभिनंदन ग्रंथ के संपादक रामेश्वर वैष्णव ह अपन विचार व्यक्त करत कहिन कि जागेश्वर जी के अब 75 बछर पूरा होय बर जात हे। ये अवसर म हम सब साहित्यकार मन के द्वारा एक अभिनंदन ग्रथ के प्रकाशन करे गेहे। ताकि अवइया पीढ़ी घलो जागेश्वर जी के छत्तीसगढ़ राज्य निर्माण आंदोलन,किसान आंदोलन,छत्तीसगढ़ी राजभाषा निर्माण आंदोलन अउ छत्तीसगढ़ी पत्रकारिता मे योगदान ल जान सकय। उम्मीद हे ये ग्रंथ अवइया पीढ़ी ल छत्तीसगढ़,छत्तीसगढ़ी अउ छत्तीसगढ़िया मन बर संघर्ष करे बर प्रेरित करही। अउ छत्तीसगढ़िया मन के आत्मसम्मान अउ स्वाभिमान ल जगाय के काम करही।

इहू मन रखिन अपन विचार

वरिष्ठ साहित्यकार डॉ.सुधीर शर्मा ह मंच संचालन करत जागेश्वर प्रसाद जी के राज्य निर्माण आंदोलन ल सुरता करिस। फिल्म निर्माता मनु नायक,अनिल दुबे,पूर्व विधायक गुरमुख सिंह होरा मन घलो अपन-अपन विचार व्यक्त करिन।

अध्यक्ष नियुक्ति बर निवेदन

कार्यक्रम के दौरान डॉ.सुधीर शर्मा ह छत्तीसगढ़ राजभाषा आयोग म विगत दू बछर ले रिक्त आयोग के अध्यक्ष के शीघ्र नियुक्ति करे के निवेदन करिन। डॉ.महंत ह मुख्यमंत्री ल ये संबंध म पत्र लिखे के बात कहत छत्तीसगढ़ी ल राजभाषा के आठवीं अनुसूची म सम्मिलित करे के पहल करे बर चर्चा करे के बात कहिन। अउ छत्तीसगढ़ राजभाषा आयोग म शीघ्र ही अध्यक्ष पद के नियुक्ति बर मुख्यमंत्री ल पत्र भेजे के घलो बात कहिन।

ये मन रहिन उपस्थित

कार्यक्रम म मुख्य रूप ले छसपा के अध्यक्ष दाऊ जी.पी.चंद्राकर, विधायक गुलाब कमरों,वरिष्ठ गीतकार रामेश्वर शर्मा,साहित्यकार चेतन भारती,डॉ.पंचराम सोनी,चंद्रशेखर चकोर,रसिक बिहारी अवधिया,गोविंद धनकर,राजेश चौहान,जयंत साहू,राम पटवा,काविश हैदरी,संजीव दुबे,अशोक ताम्रकार,हरिराम पाल,लाला राम वर्मा,चंद्रप्रकाश साहू,ममता अहार सहित कई  साहित्यकार,पत्रकार अउ कलाकार मन उपस्थित रहिन।


अऊ खबर

img not found

06/09/2020 अपराध

img not found

05/12/2019 this is test news22

img not found

21/11/2019 धान