🆅🅸🅳🅴🅾 सीपत : नदी तट म खुदाई के दौरान मजदूर के मौत, 4 दिन बाद भी आरोपी मन ऊपर नई होईस कार्यवाही

हिमांशु गुप्ता । बिलासपुर सीपत थाना क्षेत्र ले एक बड़का मामला आघु आए हे, कुली के लीलागर नदी तट म खुदाई करत बेरा माटी के एक बड़का टीला के धसंक जाए ले दबके परसाही गांव के एक मजदूर के मौत हो गए हे अउ घटना के 4 दिन बाद भी पुलिस कती ले आरोपी मन के ऊपर कोनो कार्यवाही नई करे जाए के मामला ह अब तूल पकड़त जावथे, हादसा के बाद लोगन पुलिस के विवेचना ऊपर सवालिया निशान खड़ा कर दिए हे। एति मृतक के परिवार ह न्याय बर गुहार लगावत हे, बतादन के परसाही के आश्रित ग्राम फुलवारीपारा निवासी मजदूर लीलाम्बर उर्फ विष्णु सिदार ह 3 दिन पहली गांव के ही जगत पोर्ते के ट्रेक्टर ले लीलागर नदी म माटी खोदे गए रहिस।

पुलिस के बताए अनुसार लीलाम्बर सिदार अउ राजकुमार नदी के तीर खदान ले माटी खोदके ट्रेक्टर म भरत रहिस ओहि बेरा माटी के एक बड़का हिस्सा ह भरभरा के लीलाम्बर के ऊपर गिर गे अउ माटी के ढेर म दबके लीलाम्बर के मौका म ही मौत हो गे, जगत पोर्ते अउ कृपाल कश्यप ह माटी के ढेर म दबे लीलाम्बर के मृत शरीर ल बाहर निकालिस अउ बिना पुलिस ल सुचना दिए मृतक के शव ल 9 किमी दुरिहा गाड़ी म सवारी जैसे बैठाके मृतक के घर लेके पहुंचिस, अउ जगत ह मृतक के पत्नी ल बताइस के लीलाम्बर के चक्कर आए के वजह ले मौत हो गईस,  अब सवाल ए उठथे के महिंद्रा ट्रेक्टर ले माटी के अवैध उत्खनन करे जावत रहिस, ओखर इंश्योरेंस नई रहिस अउ जगत ह लंबा समय ले बिना बीमा पॉलिसी के ओ ट्रेक्टर ले माटी के अवैध उत्खनन म ट्रेक्टर के संचालन करत रहिस। घटना के तत्काल बाद मौका ले ओ ट्रेक्टर ल गायब कर देहे गईस अउ ओखर एवज म पुलिस ल जगत ह अपन भाई लक्ष्मीनारायण के सोनालिका ट्रेक्टर के दस्तावेज ल ए कहत हुए जमा करिस के अही ट्रेक्टर ल किराया म लेके माटी खोदे के काम करे जात रहिस अउ बड़का विडंबना के बात तो ये हे के पुलिस ह एला ही सही मान लिहिस।