सरकारी स्कूल म 77 लाख के गड़बड़ी
बिलासपुर के बेलतरा हायर सेकेंडरी स्कूल म एरियर राशि म 77 लाख रुपिया के गड़बड़ी के मामला आघू आए के बाद लेक्चरर पुन्नीलाल कुर्रे ल करे गईस सस्पेंड, DEO ह प्रिंसिपल, क्लर्क अउ लेक्चरर के खिलाफ रतनपुर थाना म कराईस FIR, तत्कालीन प्राचार्य ह बाबू के साथ मिलके लेक्चरर ल 11 महीना म 22 बार दिहिस एरियर।
बीजापुर कलेक्टर उपर प्रताड़ना के आरोप
छत्तीसगढ़ युवा आयोग के पूर्व सदस्य अजय सिंह ह बीजापुर कलेक्टर राजेंद्र कटारा उपर मानसिक रूप ले प्रताड़ित करे के लगाईस आरोप, अजय सिंह कहिस विधायक विक्रम मंडावी के दबाव म कलेक्टर ह मानसिक रूप ले करत हे प्रताड़ित, कलेक्टर के तबादला नई करे म आत्मदाह के दिहिस धमकी।
छत्तीसगढ़ म मध्यप्रदेश ले लाए जाही बाघ
छत्तीसगढ़ म बाघ के संख्या बढ़ाए बर मध्यप्रदेश ले लाए जाही बाघ, बारनवापारा अभ्यारण्य म छोड़े जाही टायगर, छत्तीसगढ़ राज्य वन्य जीव बोर्ड के बईठक म प्रस्तुत करे गए प्रस्ताव ल देहे गईस मंजूरी।
चलत ट्रेन के नीचे आके युवक के मौत
जांजगीर-चांपा के अकलतरा रेलवे स्टेशन म चलत ट्रेन म चढ़त बेरा युवक के पैर फिसले ले ट्रेन के नीचे आए ले होईस मौत, बिलासपुर के सरकंडा निवासी कुश यादव अपन परिवार के साथ छठी कार्यक्रम म शामिल होए जावत रहिस रायगढ़।
चूहा ले परेशान होके बुजुर्ग पहुंचिस थाना
बालोद गुंडरदेही थाना क्षेत्र के ग्राम कचांदुर म एक बुजुर्ग चूहा ले परेशान होके पहुंचिस थाना, बुजुर्ग बिसाहूराम टंडन अपन पड़ोसी युवराज मारकंडे उपर लगाईस गंभीर आरोप, कहिस मोर घर के दीवार तरफ धान के बोरी रखे ले चूहा मन घर ल करिन बर्बाद, दूनों पक्ष के शिकायत म पुलिस जांच करिस शुरू।
मामूली विवाद म दोस्त के हत्या
सारंगढ़-बिलाईगढ़ कोतवाली थाना क्षेत्र के कटेकोनी इलाका म 3 दोस्त मन अपन ही दोस्त के करिन हत्या, शराब पीए के बेरा कहासुनी के दौरान होए विवाद म 3 दोस्त मन मिलके अपन दोस्त के पथरा ले कुचल के उतारिस मौत के घाट, पुलिस ह तीनों आरोपी ल कर लिए हे गिरफ्तार।
गांव म ग्राम पटेल के दबंगई
गरियाबंद झाखरपारा पंचायत के आश्रित ग्राम केंदुबंद म ग्राम पटेल के दबंगई के आईस मामला, कई पीढ़ि ले रहत परिवार ल घर ले करिस बेदखल, दरवाजा म दीवार खड़ा करे म 8 महीना के गर्भ लेहे महिला समेत परिवार ह ओडिशा म लिहिस शरण, पीड़ित परिवार थाना, तहसील अउ एसडीएम कार्यालय जाके मदद के लगाईस गुहार।
हिस्ट्रीशीटर हत्याकांड : 7 आरोपी के पेशी
बिलासपुर म हिस्ट्रीशीटर संजू त्रिपाठी के हत्या मामला म शामिल मृतक के पिता-भाई समेत 7 आरोपी ल जिला न्यायालय म करे गईस पेश, दूनों पक्ष के बहस सुने के बाद न्यायाधीश ह 3 आरोपी ल 2 दिन के पुलिस हिरासत म देहे जाए के सुनाईस फैसला।
रायपुर के कलिंगा विश्वविद्यालय म बलवा
नया रायपुर के कोटनी स्थित कलिंगा विश्वविद्यालय म छात्र के 2 गुट म होईस बलवा, विवि के पास आउट सीनियर अउ जूनियर छात्र म जमके होईस मारपीट, कई छात्र ल आईस चोट, पुलिस हिरासत म लेहे गईस 3 छात्र, मंदिर हसौद पुलिस मामला के करत हे पड़ताल।
पुलिस-नक्सली मुठभेड़ म 1 नक्सली ढेर
बीजापुर मिरतुर थाना क्षेत्र म तिमेनार अउ पोरोवाडा के जंगल म पुलिस-नक्सली मुठभेड़ म एक नक्सली होईस ढेर, मौका ले हथियार, विस्फोटक अउ अन्य सामग्री करे गईस बरामद, भैरमगढ़ एरिया कमेटी के माओवादी के उपस्थिति के सूचना म निकले रहिस डीआरजी अउ एसटीएफ के टीम।
लापता ऑटो चालक के मिलिस लाश
रायपुर के आरवीएच कॉलोनी ले लापता ऑटो चालक युवक देवेंद्र तांडी के कॉलोनी के पाछू नाला म मिलिस लाश, हत्या कर लाश नाला म फ़ेंके के हे आशंका, मामला के जांच म जुटिस खमतराई पुलिस।
आंगनबाड़ी के 9 लईकन डायरिया के शिकार
बालोद के कन्हारपूरी गांव म डायरिया फ़ईले ले स्वास्थ्य विभाग म मचिस हड़कंप, आंगनबाड़ी के 9 लईकन समेत 13 लोगन डायरिया के होईन शिकार, उल्टी दस्त के शिकायत के बाद सब्बो ल लाए गईस अस्पताल।
कुत्ता के हमला ले 9 लोगन घायल
बालोद जिला म आवारा कुत्ता मन के आतंक ले दहशत के बने हुए हे माहौल, 3 गांव के 9 लोगन कुत्ता के हमला ले होईन घायल, सब्बो ल सामुदायिक स्वास्थ्य केंद्र अर्जुन्दा म कराए गईस भर्ती, घायल मन के हालचाल जाने पहुंचे विधायक कुंवर सिंह बेहतर चिकित्सा के दिहिस निर्देश।
नेशनल हाईवे म 2 युवक के मौत
कवर्धा पिपरिया थाना क्षेत्र के ग्राम इंदौरी म रायपुर जबलपुर नेशनल हाईवे म होईस बड़का हादसा, कवर्धा कति ले बाइक म जावत दशरंपुर गांव के 2 युवक ओवरटेक करे के दौरान एक कंटेनर वाहन के पाछू टकराए ले दूनों युवक के होईस मौत, कंटेनर चालक मौका ले हे फरार।
23 दिसंबर के बाद बाढ़ही ठंड
छत्तीसगढ़ म मौसम परिवर्तन के अब दिखे लगिस असर, 23 दिसंबर के बाद प्रदेश म तेज गति ले बढ़ने वाला हे ठंड, अंबिकापुर, मैनपाट, चिरमिरी अउ कोरिया जईसे इलाका म न्यूनतम तापमान म भारी गिरावट आए के हे संभावना, उहें रायपुर अउ बलौदाबाजार जईसे इलाका म घलो ठंड बढ़े के हे संभावना।
21 लाख के ठगी करईया दंपति गिरफ्तार
रायपुर म ठगी करईया फरार आरोपी दंपति ल फाफाडीह चौक ले करे गईस गिरफ्तार, 4 बछर पहिली साकिन डगली काॅम्लेक्स बीरगांव निवासी आरोपी दंपति सुजाता अउ लल्लन कुमार राव ह रामेश्वर नगर भनपुरी निवासी छबीराम वर्मा ले रजिस्ट्री के नाव म 21 लाख रूपिया के ठगी कर हो गए रहिन फरार।
दहेज प्रताड़ना : पति अउ सास-ससुर अंदर
दहेज प्रताड़ना के मामला म राजनांदगांव बसंतपुर पुलिस ह पीड़िता के शिकायत म हैदराबाद निवासी आरोपी युवक अउ माता-पिता ल करिस गिरफ्तार, आरोपी पति भरत कुमार मामिदी अउ माता-पिता ह दहेज म 1 किलो सोना अउ 15 लाख रुपिया लाए बर करत रहिन परेशान अउ जान ले मारे के देवत रहिन धमकी।
21 दिसंबर के रमन सिंह के बिलासपुर आगमन
मोर आवास मोर अधिकार, के तहत 21 दिसंबर के बिलासपुर मस्तूरी विधानसभा सीपत मण्डल के सोंठी होवथे पूर्व मुख्यमंत्री डॉ रमन सिंह के आगमन, सोंठी पिपरानार स्टेडियम के सभा म होही शामिल, जांजी ले सोंठी तक युवा मन बाइक रैली के संग होही शामिल, प्रधानमंत्री आवास योजना ल छत्तीसगढ़ म लागू करे जाए बर करे जाही मांग, 22 दिसंबर के सीपत सामुदायिक भवन म भाजपा के संगठनात्मक कार्यक्रम म होही शामिल, भाजपा कार्यकर्ता मन तैयारी ल देवथे अंतिम रूप, डॉ रमन के आगमन ल लेके प्रशासन भी पूरा तरह रईही मुस्तैद
8 ले 12 जनवरी तक होही वार्षिक मेला
कांकेर नगर म 8 ले 12 जनवरी तक होही वार्षिक मेला, जेला लेके नगर पालिका परिषद म कई मंदिर के गायता पुजारी मन के होईस बैठक, बैठक म मेला महोत्सव ल लेके होईस चर्चा, पाछु तीन बछर कांकेर मेला म कोरोना रहिस साया, ऐ बछर होही धूमधाम ले वार्षिक मेला।
