छत्तीसगढ़ के आज के दिनभर के हर छोटे बड़े खबर पढ़व फटाफट अऊ मात्र 2 मीनट म हो जावव हर खबर ले अपडेट

छत्तीसगढ़ ले कोरोना के छुट्टी

छत्तीसगढ़ ले कोरोना के होईस छुट्टी, ढाई बछर बाद पहिली बार वायरस ले मुक्त होईस प्रदेश, अब प्रदेश म नई बांचिस एक भी सक्रिय मरीज, छत्तीसगढ़ म कोरोना के पॉजिटिविटी रेट होईस 0.00 प्रतिशत

अपन बयान उपर सिंहदेव के सफाई

मंत्री सिंहदेव चुनाव ले पहिली भविष्य ल लेके निर्णय लेहे जाए वाला बयान उपर दिहिस सफाई, कहिस कांग्रेस म कोई भी अपन ले नई बनय मुख्यमंत्री, सब कुछ तय करथे हाईकमान, सिंहदेव के बयान उपर चुटकी लेवत BJP ल दिहिस नसीहत, कहिस भाजपा ल देखना चाही अपन घर। 

दू महिला पटवारी ले बदसलूकी

गौरेला-पेंड्रा-मरवाही के गौरेला के गुम्माटोला गांव म धान के भौतिक सत्यापन बर पहुंचे 2 महिला पटवारी के साथ करे गईस गाली गलौज, खेत म लगे धान ल देखाए ले मना करत हुए पटवारी तनुजा भोमटे अउ प्रिया सक्सेना के साथ किसान के बेटा राजेश सिंह ह करिस अभद्र व्यवहार, आरोपी के तलाश जारी।

लकड़ी ड्रिल करे के औजार ले हत्या

जशपुर के बरटोली मोहल्ला म लकड़ी ड्रिल करे के औजार ले गला छेदके एक युवक के बेरहमी ले करे गईस हत्या, दरवाजा म खून ले लथपथ मिलिस युवक के लाश, मृतक आशीष भगत टेंट हाउस म करत रहिस मजदूरी, जान-पहिचान द्वारा हत्या करे जाए के पुलिस ल हे आशंका।

रोजगार मेला म युवा मन ल धोखा

बिलासपुर म बेरोजगारी के मार झेलत बी-टेक, MBA अउ PG डिग्रीधारी युवा मन के रोजगार मेला म उमड़िस भीड़, अलग-अलग प्राइवेट कंपनी 45 हजार सैलरी देहे के करिस दावा, लेकिन इंटरव्यू देहे पहुंचे म बताईस 20 हजार रुपिया, बिना आवेदन जमा करे लहुटिन बेरोजगार।

किसान ले 8 लाख के उठाईगिरी

कोरबा उरगा थाना क्षेत्र म बैंक ले पईसा निकालके घर जावत एक किसान उठाईगिरी के होईस शिकार, बरपाली चौक म किसान राकेश गभेल ले अज्ञात बाइक सवार मन दुपहिया वाहन के डिग्गी म रखे 8 लाख 16 हजार रुपिया ले भरे थैला करिन पार, रोवत थाना पहुंचिस किसान।

स्टंट करना युवक ल परिस भारी

अंबिकापुर म एक युवक ल स्टंट करना परिस भारी, पीजी कॉलेज मैदान म कार ले स्टंट करत युवक के छात्र मन सोशल मीडिया म वीडियो करिन वायरल, वायरल वीडियो के बाद पुलिस युवक ल 2 हजार के थमाईस चालान।

रिश्वत लेवईया महिला क्लर्क सस्पेंड

सूरजपुर म महिला क्लर्क के रिश्वत लेवत वीडियो वायरल होए के बाद कलेक्टर इफ्फत आरा ह करिस सस्पेंड, पिल्खा तहसील म पदस्थ क्लर्क रीता झा ह प्रतिबंधात्मक मामला म जेल गए युवक के केस खत्म करे के एवज म 1500 रुपिया के करे रहिस मांग, रिश्वत लेवत वीडियो होए रहिस वायरल।

ट्रैफिक नियम तोड़े म उठाना परही कचरा

सड़क सुरक्षा अउ ट्रैफिक सेंस म जागरूकता लाए बर दूसरा तरीका अख्तियार करिस दुर्ग पुलिस, बिना हेलमेट अउ सीट बेल्ट लगाए गाड़ी चलवईया मन ले उठवाए गईस सड़क किनारे कचरा, ट्रैफिक नियम तोड़ईया मन उपर SP बरतिस सख्ती, 1 दिन म 700 ‌वाहन के काटिस चालान

नदी किनारे ले दर्जनों कब्र गायब

कोरबा जिला म रेती चोर मन के हरकत ले घाट म मौजूद लोगन के कब्र होए लगिस गायब, घाट के बंद होए के बावजूद दिन-रात निकाले जावत हे रेती, नदी किनारे ले दर्जनों कब्र होईस गायब, आक्रोशित ग्रामीण थाना म करिन शिकायत।

हाईवा ले टकरा के कार म लगिस आगी

बिलासपुर सकरी थाना क्षेत्र म हाईवा अउ कार म होईस टक्कर, ट्रक ले टकराईस कार, जेखर बाद कार म लगिस भीषण आगी, कार सवार होटल संचालक बुरा तरह झुलस के होईस घायल, मगरपारा निवासी संचालक सैय्यद परवेज होटल बंद कर लहुटत रहिस वापस।

नाबालिग के साथी निकलिस हत्यारा

आरंग के ग्राम भानसोज म नाबालिग छात्र के हत्या करईया आरोपी ल आरंग पुलिस महासमुंद के डूमरपाली गांव ले करिस गिरफ्तार, हत्या के बाद अपन रिश्तेदार के इहां छुपाए रहिस लाश, आरोपी अउ मृतक दूनों मिलके गांव म करत रहिस धान चोरी, नाव उजागर होए के डर ले आरोपी दुर्गेश निर्मलकर ह रूपेंद्र निर्मलकर के गला दबाके करे रहिस हत्या।

5 लाख के ठगी करईया ठग गिरफ्तार

बिलासपुर तारबाहर थाना क्षेत्र निवासी व्यापारी विवेक बंसल ले ठगी के आरोपी ल दिल्ली ले करे गईस गिरफ्तार, व्यापारी ल कंपनी के फ्रेंचाइजी देवाए के झांसा देके 5 लाख के ठगी करईया दिल्ली के गांधीनगर निवासी ठग वाहिद अली ल गिरफ्तार कर लाए गईस बिलासपुर।

19 जुआरी अउ बाइक चोर गिरफ्तार

धमतरी पुलिस चौकी करेली बड़ी ह जुआरी मन उपर करिस बड़का कार्यवाही, 19 जुआरी ल जुआ खेलत करे गईस गिरफ्तार, जुआरी मन ले नगद रूपिया, एक मारुति कार, 6 बाईक अउ मोबाईल के होईस जब्ती, साथ ही बाइक चोरी करईया आरोपी ल घलो सायबर टीम अउ नगरी पुलिस करिस गिरफ्तार।

इंस्टाग्राम म युवती के अश्लील फोटो वायरल

बिलासपुर म इंस्टाग्राम म एक पीड़िता के अश्लील फोटो वायरल करे के आरोपी ल पुलिस करिस गिरफ्तार, साकिन विजयापुरम एफ 63 सरकंडा

प्रधान पाठक ट्रेन ले कटके दिहिस जान

जांजगीर-चांपा के नैला चौकी थाना क्षेत्र के खोखसा फाटक कना 55 वर्षीय शख्स ह ट्रेन ले कटके करिस आत्महत्या, मृतक सुरेश यादव बलौदा विकासखंड के नवागांव के मिडिल स्कूल म प्रधान पाठक के पद म रहिस पदस्थ, बेटा के बिहाव बर बैंक ले लेहे रहिस लाखों के लोन, प्री वेडिंग शूट के दिन करिस खुदकुशी।

पुलिस के सूझबूझ ले टलिस बड़का हादसा

केशकाल फरसगांव थाना क्षेत्र नेशनल हाईवे 30 म पुलिस के सूझबूझ अउ सतर्कता ले टलिस बड़का हादसा, देर रात दारू के नशा म सवारी ले भरे पायल ट्रेवल्स बस ल चलावत रहिस ड्राइवर, बस बैलाडिला से जावत रहिस दुर्ग, ए दौरान ड्राइवर ल रोक के पुलिस सब्बो यात्री के बचाईस जान।

नवागढ़ नगर वासी मन ल मिलिस सौगात

बेमेतरा जिला के नवागढ़ नगर वासी के बहुप्रतीक्षित मांग राजीव गांधी चौक ले बस स्टैंड नवागढ़ के ह्रदय स्थल गौरव पथ रोड ल डामरीकरण के मिलिस सौगात, गुरुदयाल सिंह बंजारे संसदीय सचिव, विधायक नवागढ़ ह दिस सौगात, प्रगति म चलत हे कार्य।