छत्तीसगढ़ के समाचार छत्तीसगढ़ी म, पढ़व छत्तीसगढ़ के आज के हर छोटे बड़े समाचार अऊ रहव अप टू डेट

भारतीय जनता पार्टी के नवनियुक्त कार्यकारी राष्ट्रीय अध्यक्ष नितिन नबीन ह आज नई दिल्ली के भाजपा के मुख्यालय म कार्यभार संभालीन हे। ए बेरा म केंद्रीय गृहमंत्री अउ पूर्व पार्टी अध्यक्ष अमित शाह, निवर्तमान राष्ट्रीय अध्यक्ष जगत प्रकाश नड्डा अउ पार्टी के आने नेता मन ह श्री नबीन के सुवागत करीन अउ कार्यभार संभाले म ओमन ल बधई दीन।

विस-धान खरीदी

राज्य विधानसभा म आज विपक्षी सदस्य मन ह धान खरीदी म अव्यवस्था के आरोप लगात हुए एखर उपर काम रोको प्रस्ताव के माध्यम ले तुरते गोठ कराय के मांग करीन। इही बिसय म मंत्री के जवाब ले असंतुष्ट होके विपक्षी सदस्य मन ह सदन के कार्रवाही के बहिष्कार घलो करीन। ए मामला म ग्राह्यता चर्चा के चलत विपक्षी सदस्य मन ह आरोप लगइन के धान खरीदी प्रक्रिया म अव्यवस्था अउ कुप्रबंधन के चलत किसान मन ल कतकोन समस्या के सामना करे बर पड़त हे।

खाद्यमंत्री दयालदास बघेल ह विपक्ष के आरोप म प्रतिवाद जतात हुए किहीन कि प्रदेस म धान खरीदी व्यवस्था ह अच्छा होय हे अउ किसान मनके हित ल धियान म राखत हुए टोकन व्यवस्था के सरलीकरण करे गेहे। ओमन ह बतइन कि धान खरीदी के बदला म अभू तक साढ़े सात हजार करोड़ रूपिया ले जादा के रासि के भुगतान हो चुके हे। अेमन ह ए बात ले मना करीन हे कि धान खरीदी ल लेके किसान मन म नाराजगी हे।

एखर ले पहिली, प्रश्नकाल के तुरते बाद नेता प्रतिपक्ष डॉ. चरणदास महंत ह धान खरीदी म अव्यवस्था के मामला उठाइन अउ काम रोको प्रस्ताव के सूचना देके तुरते गोठ कराय के मांग करीन। एखर उपर विधानसभा अध्यक्ष डॉ. रमन सिंह ह काम रोको प्रस्ताव के ग्राह्यता म चर्चा के अनुमति दीन। डॉ. महंत के बाद ए गोठ म सामिल होके पूर्व मुख्यमंत्री भूपेश बघेल ह किहीन कि सदन म अगर ग्राह्य करके गोठ कराय जाथे, त सत्ता पक्ष के सदस्य मन ल घलो बोले के मउका मिलथे अउ सरकार कोति ले एखर बर जवाब आतिस। ओमन ह किहीन कि धान खरीदी ले जुड़े समिति के प्रबंधक कर्मचारी अउ कम्प्यूटर ऑपरेटर हड़ताल म चले गेहे।

विस-बेरोजगारी भत्ता

शीतकालीन सत्र के दूसर दिन राज्य विधानसभा म बेरोजगारी भत्ता ल लेके जोरदरहा हंगामा होइस। संगेसंग सत्ता पक्ष अउ विपक्ष के बीच नाराबाजी घलोक होइस। कांग्रेस विधायक लखेश्वर बघेल ह प्रश्नकाल म ए जाने बर चाहत रिहीस हे, कि पाछू एक अप्रैल दू हजार चौबीस के स्थिति म प्रदेस के पंजीकृत बेरोजगार मनके कुल संख्या कतेक हवय। जेखर जवाब म मंत्री गुरू खुशवंत साहेब ह बतइन कि ए अवधि म ग्यारा लाख उनचालीस हजार ले जादा पंजीकृत बेरोजगार हे।

मंत्री ह अपन जवाब म बेरोजगार मन ल रोजगार इच्छुक बतात हुए किहीन कि बेरोजगार मन बर रोजगार मेला अउ प्लेसमैंट कैंप के आयोजन करे जात हे। अभू के स्थिति म करीबन पंद्रह लाख पंजीकृत बेरोजगार हवय। मंत्री ह बतइन कि बहुत जल्दी राज्य स्तरीय रोजगार मेला आयोजित करके चौदह हजार ले जादा युवा मन ल रोजगार दे जाही।

कांग्रेस विधायक उमेश पटेल अउ पूर्व मुख्यमंत्री भूपेश बघेल ह प्रदेस म युवा मन के बेरोजगारी भत्ता नइ दे जाय के बिसय म सवाल उठाइन, जेखर जवाब म मंत्री ह बतइन कि युवा मन ल सक्षम अउ सामर्थ्यवान बनाय जात हे, जेला लेके सदन म सत्ता पक्ष अउ विपक्ष के सदस्य मनके बीच बहस सुरू होगे रिहीस, अउ एखर बाद मंत्री के जवाब ले असंतुष्ट विपक्ष ह सदन ले बर्हिगमन घलो कर दीन।

विस-अनुपूरक बजट

वित्त मंत्री ओ.पी. चौधरी ह आज राज्य विधानसभा म बछर दू हजार चौबीस-पच्चीस बर पहिली अनुपूरक बजट पेस करीन। एमा पैंतीस हजार करोड़ रूपिया के रासि के प्रावधान करे गेहे। जेखर उपर गोठबात के बाद काली सदन म एला पारित करे जाही।

विशेष कार्यक्रम

आकाशवाणी केंद्र रईपुर कोति ले ‘‘एसबीआई सम्मान राष्ट्रीय नायकों को श्रध्दांजलि‘‘ बिसय उपर एक ठिन बिसेस कारीकरम के प्रसारण करे जाही। ए कारीकरम ह काली सोलह दिसंबर के बिहनिया सवा नौ बजे ले साढ़े नौ बजे तक आकाशवाणी केंद्र रईपुर ले सुने जा सकही। एखर प्रसारण छत्तीसगढ़ के सबो आकाशवाणी केंद्र ले करे जाही।

एसआईआर-समीक्षा बैठक

मुख्य निर्वाचन पदाधिकारी यशवंत कुमार ह प्रदेस म चलत मतदाता सूची के विशेष गहन पुनरीक्षण-एसआईआर के प्रगति के समीक्षा करीन। ओमन ह रईपुर म बइठका लेके निर्वाचन अधिकारी मन ल निरदेस दीन कि ओमन ह अपन -अपन विधानसभा क्षेत्र म गणना पत्रक मनके भौतिक परीक्षण करके बीएलओ ऐप म अनिवार्य रूप ले अपलोड कराना सुनिश्चित करय। ओमन ह किहीन हे कि मतदाता मनके नाम सूची ले हटाय जाथे। ओखर बारे म जरूरी प्रमाण घलो सुरक्षित राखे जाय।

श्री कुमार ह निरदेस दीन हे कि छूटे हुए सबो पात्र मतदाता मनके पुनरीक्षण सुनिश्चित करे जाय अउ अनुपस्थित, स्थानांतरित अउ मृत श्रेणी के मतदाता मनके भारत निर्वाचन आयोग के निरदेस के अनुसार सटीक सत्यापन करके जरूरी कार्रवाई करे जाय। ओमन ह अप्राप्त गणना पत्रक के सूची संबंध म राजनीतिक दल के बीएलए के संग समन्वय बनाके उंखर हस्ताक्षर प्राप्त करे के निरदेस घलो दीन। मुख्य निर्वाचन पदाधिकारी ह अधिकारी मन ल ए सुनिश्चित करे बर किहीन हे कि कोनो भी पात्र मतदाता मनके नाम सूची ले झन छूटे रहय।

‘जेन जी पोस्ट आफिस

भारतीय प्रौद्योगिकी संस्थान-आईआईटी भिलाई म ‘जेन जी पोस्ट ऑफिस‘‘ पहल के सुरूआत करे गेहे। छत्तीसगढ़ परिमंडल के मुख्य पोस्ट मास्टर जनरल अजय सिंह चौहान अउ आईआईटी के भिलाई के निदेसक प्रोफेसर राजीव प्रकाश ह आज ए डाकघर के सुभारंभ करीन। ए पोस्ट ऑफिस ले सुरू करे के उद्देस्य नवा पीढ़ी, खास करके जेन जी ल डाक नेटवर्क ले सरलग जोड़े रखना अउ डाक सेवा म उंखर सक्रिय भागीदारी सुनिश्चित करना हे। एखर ले जवान लइका मन ल डाक विभाग के बदलत भूमिका जइसे डाक बैकिंग, लॉजिस्टिक, डिजीटल सेवा अउ जनकल्याणकारी योजना ले परिचित कराय जाही। उहें, पढ़इया लइका मन ल डाक सेवा ले जुड़े नवाचार सुझाव अउ सहभागिता बर घलो प्रोत्साहित करे जाही।

बाघ-मौत

सूरजपुर जिला के वाड्रफनगर वन परिक्षेत्र के भैंसामुंडा के जंगल म एक बाघ के संदिग्ध परिस्थिति म मउत होगे। वन विभाग के प्राथमिक जांच म बाघ के सरीर म चोट के निशान पाय गेहे, जेखर ले हमला के आसंका जताय जात हे। वन विभाग के कहना हे कि पोस्टमार्टम रिपोर्ट आय के बाद ही मउत कारण स्पष्ट हो पाही। ऐति, घटना के सूचना मिलतेच वरिष्ठ अधिकारी मन ह मउका म पहुंचके तिर-तखार के जंगल म गस्त ल बढ़ा देहे। ए घटना के बारे म उंहा के रहइया लोगन मनले पूछताछ घलो करे जात हे।

उहें, खैरागढ़ जिला के मुढ़ीपार कोपेनवागांव के जंगल म घलो एक तेंदुआ ह संदिग्ध परिस्थिति म मृत पाय गेहे। ग्रामीण ले मिले सूचना के बाद वन विभाग के टीम ह मउका म पहुंचके स्थिति के जांच करीन। प्राथमिक जाच म तेंदूआ के चार पैर के नाखून गायब मिले हे अउ उंखर जबड़ा घलो नइ मिले हे। मउका म डॉग स्क्वायड ले जांच कराय जावत हे अउ शक के आधार उपर पूछताछ बर कुछेक लोगन मन ल हिरासत म घलो ले गेहे।

श्रम हितग्राही भुगतान

श्रम विभाग ह स्पष्ट कर देहे कि सफाई कर्मी मन बर चलत जरूरी उपकरण सहायता योजना बर चुने गे आठ झिन हितग्राही मन ल रासि के भुगतान तकनीकी कारण ले नइ हो पाय हे। सहायक श्रम आयुक्त ह बतइन कि पंजीयन के बेरा गलत बैंक खाता नंबर, बैंक खाता बंद या मर्ज होय या फेर आईएफसी कोड म बदलाव जइसे स्थिति के सेति भुगतान करना संभव नइ होवय। श्रम विभाग कोति ले अपील करे गेहे कि हितग्राही मन ह दस दिन के भीतरी म जरूरी विवरण उपलब्ध करावय, नइ त उंखर आवेदन निरस्त माने जाही।

अर्चिता मिस्त्री-अंडर-19 क्रिकेट

कोंडागांव जिला के फरसगांव ब्लाक के जुगानी कैम्प के अर्चिता मिस्त्री ह हैदराबाद म चलत प्रतिष्ठित राष्ट्रीय प्रतियोगिता म राज्य के प्रतिनिधित्व करत हे। छत्तीसगढ़ स्टेट क्रिकेट संघ ह अर्चिता ल अवइया वूमेन्स अंडर-19 क्रिकेट वन्डे ट्रॉफी बर चुने हे।