छत्तीसगढ़ के समाचार छत्तीसगढ़ी म, पढ़व छत्तीसगढ़ के आज के हर छोटे बड़े समाचार अऊ रहव अप टू डेट
छत्तीसगढ़ के समाचार छत्तीसगढ़ी म, पढ़व छत्तीसगढ़ के आज के हर छोटे बड़े समाचार अऊ रहव अप टू डेट
कृषि मंत्री अउ ग्रामीण विकास मंत्री शिवराज सिंह चौहान ह आज लोकसभा म विकसित भारत – रोजगार अउ आजीविका मिशन-ग्रामीण विधेयक पेश करीन। ए विधेयक महात्मा गांधी राष्ट्रीय ग्रामीण रोजगार गारंटी अधिनियम, यानी मनरेगा के जघा लीहीं। विधेयक विकसित भारत दू हजार सैंतालीस ल देखत एक आधुनिक वैधानिक ढांचा तैयार करही। एखर तहत हरेक ग्रामीण परिवार के मरजी ले अकुसल सारीरिक श्रम करइया वयस्क मनखे ल एक सौ पच्चीस दिन के रोजगार दे जाही। एखर ले ग्रामीण अर्थव्यवस्था ल मजबूती मिलही।
नवा विधेयक के उद्देश्य चार प्राथमिकता वाले क्षेत्र मे माध्यम ले रोजगार अउ टिकाऊ ग्रामीण अवसंरचना के निर्माण करना हे। एमा जल संबंधी काम के माध्यम ले जल सुरक्षा, ग्रामीण बुनियादी ढांचा, आजीविका संबंधी अवसंरचना अउ मौसमी घटना ले निपटे बर विशेष काम सामिल हे। नवा विधेयक के उद्देश्य मजदूर मन ल जादा ले जादा काम देके गारंटी, सुघ्घर मजदूरी, मजबूत सुरक्षा प्रदान करना हे।
हसदेव अरण्य इलाका म खनन के गूंजीस मुद्दा
राज्य विधानसभा म आज हसदेव अरण्य इलाका म खनन के मुद्दा गूंजीस। मुख्य विपक्षी दल कांग्रेस ह ए मामला म स्थगन लाके चर्चा कराय के मांग करीन, जेला आसंदी ह मना कर दीस। एखर बाद विपक्षी सदस्य मन ह गर्भगृह म जाके हंगामा करीन, जेखर ले ओमन खुदे निलंबित होगे। बाद म विधानसभा अध्यक्ष डॉक्टर रमन सिंह ह कांग्रेस विधायक मनके निलंबन ल खतम कर दीन।
विपक्ष के स्थगन प्रस्ताव म पूर्व मुख्यमंत्री भूपेश बघेल ह कहिन कि खदान नइ खोले जाय ल लेके अशासकीय संकल्प पारित करे गे रिहीस। एखर बाद घलो सरगुजा अउ बस्तर म जंगल काटे जावत हे अउ एखरे खिलाफ स्थगन प्रस्ताव लाय गेहे। ओमन विभागीय मंत्री उपर गलत जानकारी देके आरोप लगईन।
विपक्ष के स्वाल के जवाब देवत वन मंत्री केदार कश्यप ह कहिन कि राज्य सरकार ह वन, वन्यजीव, आदिवासी अउ पर्यावरण बर संवेदनशील हवय अउ एखर संरक्षण अउ संवर्धन बर काम करे जावत हे। ओमन किहीन कि पेड़ मनके कटाई नियम के मुताबिक करे जावत हे।
राज्य के औद्योगिक इकाई म सुरक्षा मानक के उल्लंघन के उठीस मुद्दा
विधानसभा म आज भाजपा सदस्य अजय चंद्राकर, धर्मजीत सिंह, अनुज शर्मा अउ नेता प्रतिपक्ष डॉक्टर चरणदास महंत ह ध्यानाकर्षण प्रस्ताव के माध्यम ले राज्य के औद्योगिक इकाई म सुरक्षा मानक के उल्लंघन के मुद्दा उठईन। अजय चंद्राकर ह आरोप लगईन कि राज्य के औद्योगिक इकाई म सुरक्षा मानक के उल्लंघन होवत हे। ओमन कहिन कि राज्य के औद्योगिक इकाई म सरलग होवत घटना चिंता के बिसय हवय।
अपन जवाब म उद्योग मंत्री लखनलाल देवांगन ह कहिन कि पाछु बछर उद्योग अउ वाणिज्य विभाग डहार ले कई ठिन औद्योगिक इकाई मनके निरीक्षण करके नियम के उल्लंघन करइया उद्योग म संतानवे लाख रूपिया ले जादा के जुर्माना लगाय गेहे। उहें, ए बछर नौ सौ सोलह औद्योगिक इकाई के निरीक्षण करे गीस, जेमा ले दू सौ छियासठ इकाई म आपराधिक मामला दर्ज करे गीस। उहें, पांच करोड़ छैसठ लाख रूपिया ले जादा के जुर्माना लगाय गेहे।
भाजपा विधायक धर्मजीत सिंह डहार ले राज्य के जम्मों औद्योगिक इकाई म अग्नि सुरक्षा ऑडिट कराय के मांग म उद्योग मंत्री ह औद्योगिक इकाई म अग्नि सुरक्षा ऑडिट कराय के घोसना करीन।
एखर संगेसंग विधायक अंबिका मरकाम ह सदन म सिहावा विधानसभा क्षेत्र के नगरी ब्लॉक के अंतर्गत अवइया अट्ठारह विद्यालय के टूटे-फूटे भवन के बारे म ध्यानाकर्षण प्रस्ताव लईन अउ ए भवन के निर्माण के मांग करीन। एमा स्कूल सिक्षा मंत्री गजेन्द्र यादव ह विद्यालय भवन के निर्माण अउ मरम्मत काम के आश्वासन दीन।
32 माओवादी मन करिन आत्मसमर्पण
बीजापुर जिला म आज सात माईलोगिन समेत चौंतीस झिन माओवादी मन ह आत्मसमर्पण करे हे। ए माओवादी मन ह आत्मसमर्पण के दउरान अपन-अपन हथियार ल घलो सौंपे हे। आत्मसमर्पण करइया माओवादी मन म छब्बीस झन उपर चौरासी लाख रूपिया के इनाम घोषित रिहीस। जिला के पुलिस अधीक्षक डॉक्टर जितेन्द्र कुमार यादव ह बतईन कि आत्मसमर्पण करइया माओवादी मन म डी.के.एस. जोनल कमेटी के सदस्य के संगेसंग तेलंगाना स्टेट कमेटी अउ एओबी डिवीजन के माओवादी सामिल हे। आत्मसमर्पण करइया जम्मों माओवादी मन ल राज्य सरकार के पुनर्वास नीति के तहत पचास-पचास हजार रूपिया के प्रोत्साहन रासि दे जाही।
आईएएस मन के तबादला
राज्य शासन ह भारतीय प्रशासनिक सेवा के ग्यारह झिन अधिकारी मनके प्रभार म फेरबदल करे हे। एमा छह जिला के कलेक्टर घलो सामिल हे। कोरबा कलेक्टर अजीत वसंत ल सरगुजा के कलेक्टर बनाय गेहे। उहें, दंतेवाड़ा कलेक्टर कुणाल दुदावत अब कोरबा के कलेक्टर होही। अइसने, सुकमा कलेक्टर देवेश धु्रव ल दंतेवाड़ा अउ नारायणपुर के कलेक्टर प्रतिष्ठा ममगाई बेमेतरा के कलेक्टर होही। नम्रता जैन ल नारायणपुर अउ अमित कुमार ल सुकमा कलेक्टर के प्रभार दे गेहे।
स्वच्छता दीदी-मानदेय बर तिरानवे करोड़ साठ लाख रूपिया मंजूर
राज्य सासन ह प्रदेस के आने-आने नगरीय निकायम म काम करत स्वच्छता दीदी के सालभर के मानदेय बर तिरानवे करोड़ साठ लाख रूपिया मंजूर करे हे। उपमुख्यमंत्री अउ नगरीय प्रशासन मंत्री अरूण साव के अनुमोदन के बाद एखर मंजूरी के आदेस जारी करे गेहे। ए रासि ले नगर निगम, नगर पालिका अउ नगर पंचायत म काम करत नौ हजार सात सौ पचास स्वच्छता दीदी मनके अवइया बछर तीस नवंबर तक के मानदेय के भुगतान करे जाही। स्वच्छता दीदी मन ल हर महीना आठ हजार रूपिया के मान ले भुगतान करे जाही।
जल जीवन अऊ सुपर स्पेशियलिटी हास्पिटल के उठिस मुद्दा
सदन म आज जल जीवन मिशन के मुद्दा उपर सत्तापक्ष के विधायक धरमलाल कौशिक ह सरकार ल घेरीन। ओमन भुगतान म भ्रष्टाचार के आरोप लगावत कहिन कि बिना काम पूरा होय ठेकेदार ल भुगतान कर दे गेहे। एमा विभागीय मंत्री अरूण साव ह किहीन कि योजना के तहत सत्तर प्रतिशत तक भुगतान होय हे। कहूं भी पूरा भुगतान नइ करे गेहे।
उहें, जगदलपुर विधायक किरण सिंह देव ह आज सदन म सुपर स्पेशियलिटी अस्तपाल अउ महारानी अस्पताल म कैंसर क्लीनिक के निर्माण के मुद्दा उठईन। जवाब म स्वास्थ्य मंत्री श्याम बिहारी जायसवाल ह कहिन कि जनवरी महीना म ए अस्पताल बनाय के काम सुरू हो जही।
पिछड़ा वर्ग मोर्चा के पदाधिकारी मनके नाम के घोषणा
भारतीय जनता पार्टी के प्रदेस इकाई ह भाजपा पिछड़ा वर्ग मोर्चा के पदाधिकारी मनके नाम के घोषणा कर देहे। भाजपा पिछड़ा वर्ग मोर्चा के प्रदेस अध्यक्ष अशोक साहू ह चौंतीस जिला अध्यक्ष, उनतीस प्रदेस पदाधिकारी, उनहत्तर प्रदेस कार्यसमिति सदस्य अउ पच्चीस विशेष आमंत्रित सदस्य मनके संगेसंग पांच संभाग प्रभारी मनके सूची जारी करे हे।
राजनीतिक व प्रशासनिक खबर
दिल्ली म भाजपा के कई नेता (श्रीवास्तव, सवन्नी, नीलू शर्मा, हर्षिता पांडे) पार्टी के नवा संगठन महामंत्री नितिन नवीन ला बधाई दे बर पहुँचे।
जिला सहकारी बैंक मं नवा अध्यक्ष-अध्यक्ष उपाध्यक्ष बने, रायपुर के जिम्मेदारी निरंजन सिन्हा ला मिलिस, दुर्ग मं प्रीतपाल बेलचंदन फिर ले अध्यक्ष बनिस अऊ बिलासपुर मं रजनीश सिंह के नाम होइस।
भ्रष्टाचार, पुलिस कार्रवाई अऊ कानून
सुरजपुर मं ACB तहसील के बाबू ला 25 हजार घूस लेते पकड़िस, वो मुआवजा दिलाय बर पैसा मांगथे कहि के शिकायत होइस।
न्यू ईयर ले पहिली ट्रैफिक पुलिस शराब पीके गाड़ी चलईया मन ऊपर चेकिंग चलाइस अऊ 19 चालक मन ला पकड़ के नियम मानई बर समझाइस।
किसान, जंगल अऊ पर्यावरण
सक्ती जिलामं धान खरीदी केंेंद्र मं गड़बड़ी के आरोप ऊपर पांच गांव के किसान धरना मं बइठे, प्रभारी ऊपर मनमानी के आरोप लगाय गिस अऊ तहसीलदार जांच के आदेश देिन।
हसदेव जंगल मं पेड़ काटे जाथे के मुद्दा विधानसभा मं उठिस, कूप कटाई के बहाना ले कावड़गांव के जंगल मं हरे-भरे पेड़ काटे जावत हें कहिके ग्रामीण विरोध करथें।
रायपुर मं महाराजबंध तालाब के सफाई बर ग्रीन आर्मी जुट गे, स्वच्छता अऊ पर्यावरण के बचाय बर संदेश देत काम करथें।
समाजिक घटना अऊ जन सहयोग
एक स्कूल मं जन सहयोग ले भवन-सुरक्षा सुधार बर लोहे के एंगल लगाय गीस, जेन ले असामाजिक तत्व मन के आना-जाना ऊपर रोक लगही।
सिमगा के जवरा जंगल बांधा के लगे तीन गाय के सिर मिले बर गौसेवक मन मं भारी नाराजगी दिखत हवय, आरोपी मन ऊपर कड़क कार्रवाई के मांग होवत हवय।
उपभोक्ता – जनहित खबर
खाद्य विभाग करीब साढ़े पांच हजार किलो नकली पनीर जब्त करिस, येकर सेती जनता ला पनीर अऊ मिठाई (कलाकंद, बर्फी) सोच-समझ के खरीदे अऊ खाय के सलाह देय गे हवय
पढ़व खबर फटाफट
🔴 मोहला के गुलाब गोस्वामी ला बीजेपी ओबीसी मोर्चा के प्रदेश सह‑प्रभारी बनाय गे, पाार्टी मं नवा संगठनात्मक जमावट होवत हे।
🔴 जगदलपुर मं पीजी कॉलेज ले पल्लीगांव तक रोड ला चौड़ा करे बर काम चलत हे, ठेकेदार ला तेजी ल बर नोटिस देय गे ताकि सड़क दुर्घटना कम होय।
🔴 मोहला मं बड़का हिन्दू सम्मेलन होही, हवन‑पूजन, शोभायात्रा, रक्तदान शिविर अउ हेलमेट बंटवई के संग कार्यक्रम पूरा होही।
🔴 RTI के नांव मं एक वोमन ऊपर आरोप हे के ओ मोहला जिला के कई हॉस्टल अधीक्षक ले मिलके करीब चार लाख रुपिया वसूली करे हावय, पीड़ित मन थाना पहुंचके सिकायत करीन।
🔴 सुरजपुर जंगल इलाका मं बाघ के लाश मिलिस, जांच मं खुलासा होइस के शिकारी मन करंट फँसा के बाघ ला मारीन, संदेही मन के खोज तेज हो गे हे।
🔴 ‘नियद नेल्ला नार’ योजना के तहत सुकमा के पेदाबोड़केल मं नवा सुरक्षा कैंप खुलिस, अब दूभर गांव मन घलो सुरक्षा अउ सड़क से जुड़त जावत हें।
🔴 बीजापुर मं 34 नक्सली हथियार धरके SP अउ CRPF DIG के सामने सरेंडर करीन, जम्मो ऊपर मिलके करीब 84 लाख के इनाम राखे रहिस।
🔴 खरसिया (रायगढ़) मं काव्य कलश परिवार के वार्षिक अधिवेशन मं छत्तीसगढ़ संग‑संग उत्तरप्रदेश ले आय कवि मन कविता सुनाके माहौल ला रंगीन करीन।
🔴 राज्य मं एक ठन बड़ा प्रशासनिक फेरबदल मं 11 IAS अफसर मन के जिम्मेदारी बदले गीस, कऊनो जिला के कलेक्टर घलो इधर‑उधर करे गइंन।
🔴 बस्तर संभाग मं 12 महीना ले CRMC भुगतान टंगाय रहिस, ये बात ले नाराज स्वास्थ्यकर्मी हड़ताल मं हें, दू दिन ले OPD सेवा बिगड़ गे हवय, मरीज मन ला दिक्कत होवत हे।
🔴 तेलंगाना स्टेट कमेटी के नक्सली कमांडर दामोदर उर्फ चोक्का राव अपन 15 संगवारी संग पकड़ मं आ गे, पुलिस के हिसाब ले ये मन ऊपर बड़ा इनाम रहिस।
🔴 बीजेपी ओबीसी मोर्चा के नवा पदाधिकारी लिस्ट मं रायपुर संभाग प्रभारी नायक अउ बिलासपुर संभाग प्रभारी साहू ला बनाय गे, संगठन मजबूत करे बर जिम्मेदारी देय गे।
