छत्तीसगढ़ के आज के दिनभर के हर छोटे बड़े खबर पढ़व फटाफट अऊ मात्र 2 मीनट म हो जावव हर खबर ले अपडेट
दिल्ली प्रवास ले लहुटिस राज्यपाल
दिल्ली प्रवास ले लहुटिस राज्यपाल अनसुईया उईके, आरक्षण संबंधित गतिविधि उपर राष्ट्रपति ले करिस चर्चा, शासन ल भेजे गए प्रस्ताव के जवाब आए म विचार करे के कहिस बात।
पूर्व CM के कांग्रेस सरकार उपर हमला
पूर्व मुख्यमंत्री डॉ. रमन सिंह टीएस सिंहदेव के भविष्य वाला बयान म कांग्रेस सरकार उपर जमके हल्ला बोलत दिहिस बड़का बयान, कहिस कांग्रेस म दिखे लगिस विभाजन, सिंहदेव जईसे कई कांग्रेस नेता हे असंतुष्ट।
आंध्रा एसोसिएशन ह रचिस इतिहास
आंध्रा एसोसिएशन ह रायपुर म बालाजी कल्याण मंदिर के प्रांगण म 5 करोड़ 36 लाख बार श्री विष्णु सहस्त्र नामावली पाठ कर रचिस इतिहास, 5 दिन तक लगातार 24 घंटा भगवान विष्णु सहस्त्र पारायण कर गोल्डन बुक ऑफ वर्ल्ड रिकॉर्ड म अपन नाम करिस दर्ज।
रायपुर म कोरोना के 2 नवा मरीज
प्रदेश म 2 बछर 9 महीना बाद शून्य म पहुंचे रहिस मरीज के आंकड़ा, लेकिन ए राहत एक दिन भी नई रह पाईस कायम, बुधवार के रायपुर म 2 नवा मरीज के होईस पुष्टि, चीन, जापान, जईसे देश म कोरोना के मामला के बढ़े ले अलर्ट हे सरकार, अब होही जीनोम सिक्वेंसिंग।
बिलासपुर म PHE मंत्री के विरोध
बिलासपुर म गुरु घासीदास जयंती समारोह म शामिल होए आए PHE मंत्री अउ सतनामी समाज के गुरु रुद्र कुमार ल आरक्षण के मुद्दा म अपन ही समाज के युवक मन के विरोध के करना परिस सामना, युवक मन काला झंडा देखाके मचाईस हंगामा, गुरु रुद्र कहिस BJP के इशारा म प्रदर्शन
सड़क हादसा म बाइक सवार के मौत
दुर्ग के धमधा थाना क्षेत्र म अज्ञात वाहन के टक्कर ले बाइक सवार युवक के होईस मौत, आरोपी चालक के तलाश म जुटिस पुलिस, विवेकानंद नगर, बोरसी रोड दुर्ग निवासी धर्मेंद्र बघेल के रूप म होईस मृतक के पहिचान।
जल्द शुरू होही जगदलपुर ले दिल्ली फ्लाइट
जगदलपुर ले दिल्ली तक जल्द ही विमान सेवा करे जाही शुरू, भाजपा के प्रतिनिधिमंडल ह उड्डयन मंत्री ले मुलाकात कर रखिस मांग, मंत्री ह मांग पूरा करे के दिहिस आश्वासन, राजनांदगांव सांसद अउ भाजपा बस्तर संभाग प्रभारी संतोष पांडेय, ज्योतिरादित्य सिंधिया ले करिस मुलाकात।
KBC म पहुंचिस सूरजपुर के 9वीं के छात्र
केबीसी के हॉट सीट म पहुंचिस सूरजपुर के स्वामी नारायण गुरूकुल के नवमी के छात्र तुषार बरेठ, जितिस 3 लाख रुपिया, अही गुरूकुल म अमिताभ बच्चन के फिल्म मोहब्बतें के होए रहिस शूटिंग।
जलत लकड़ी ले प्राइवेट पार्ट म हमला
कोरबा मानिकपुर बस्ती म 2 युवक मन मिलके एक युवक के प्राइवेट पार्ट म डालिस जलत लकड़ी, अपन ममा के साथ अलाव तापत अमित खलखो उपर दूनों आरोपी रंजीत अउ विक्की झगड़ा कर हमला करके होईन फरार।
नवा कोरोना वेरिएंट बढ़ा सकत हे मुश्किल
चीन, जापान, अमेरिका, दक्षिण कोरिया अउ ब्राजील जईसे देश म कोरोना के मामला बढ़े के बाद सरकार करिस अलर्ट जारी, लेकिन, बिलासपुर म कोरोना ले बांचे बर न तो स्वास्थ्य विभाग अलर्ट हे अउ न ही लोगन बूस्टर डोज लगवाए म लेवत हे रुचि, 14 लाख म सिर्फ 3 लाख 95 हजार लोगन लगवाए हे बूस्टर डोज, वैक्सीनेशन म लापरवाही उजागर।
SI राजेश चंद्रवंशी बनिस टी आई
कोरबा के एसआई राजेश चंद्रवंशी बनिस टी आई, फिटनेस लिस्ट जारी होय के बाद पुलिस महानिदेशक अशोक जुनेजा करीस जारी। प्रशंसक मन बधाई देवत उज्ज्वल भविष्य के करिस कामना।
दुष्कर्म करईया चचेरा भाई गिरफ्तार
सरगुजा अंबिकापुर के सिटी कोतवाली थाना क्षेत्र म रिश्ता ल तार-तार करे वाला घटना आईस आघू, चचेरा भाई ह बहिनी के साथ दुष्कर्म के वारदात ल दिहिस अंजाम, पीड़िता के शिकायत म दुष्कर्म करईया आरोपी चचेरा भाई नंदू रवि ल पुलिस करिस गिरफ्तार।
ट्रैक्टर ले टकराईस बाइक, 2 के मौत
बालोद म गलत साइड खड़े गन्ना से भरे ट्रक ले टकराईस बाइक, जेमा 2 युवक के होईस मौत, बालोद-धमतरी मुख्य मार्ग म ग्राम करहीभदर स्थित पेट्रोल पंप मोड़ कना होईस घटना, एक ह मौका म तोड़िस दम, दूसर के अस्पताल ले जावत बेरा गईस जान, आरोपी ड्राइवर हे फरार।
चक्कर आए ले जेल प्रहरी के मौत
जिला जेल कवर्धा म ड्यूटी म तैनात जेल के मुख्य प्रहरी के चक्कर आए ले होईस मौत, जमीन म गिरे ले प्रहरी के सिर म आए रहिस गंभीर चोट, अस्पताल ले जाए म करे गईस मृत घोषित, मृतक ईश्वर राम कुजूर मूलत जशपुर के रहिस निवासी।
नाला म इंजीनियर के मिलिस लाश
बालोद जिला मुख्यालय ले 11 किमी दूरिहा दुधली के बनगांव नाला म डेंगरापार निवासी इंजीनियर हेमंत ठाकुर के शव मिले ले क्षेत्र म फईलिस सनसनी, मृतक हेमंत जनपद पंचायत डौंडीलोहारा म रहिस पदस्थ, कुछ समय से गुरुर जनपद पंचायत करे गए रहिस अटैच, संदिग्ध हालात म मौत होए ले परिजन निष्पक्ष जांच के करत हे मांग।
सीपत म साइंस प्रदर्शनी के होइस आयोजन
वीरानी पब्लिक स्कूल बिलासपुर सीपत म साइंस प्रदर्शनी के होइस आयोजन, नर्सरी से दसवीं कक्षा तक के विद्यार्थी मन आकर्षक स्वनिर्मित मॉडल बनाके करिस अपन प्रतिभा के प्रदर्शन, अतिथि मन अवलोकन कर प्रदर्शित मॉडल के करिस सराहना, अतिथि के रूप म सीपत तहसीलदार माया अंचल, जिला पंचायत सभापति राहुल सोनवानी, इंटक कार्यकारी अध्यक्ष सलीम वीरानी होइस शामिल, अतिथि मन अवलोकन के बाद लईका मन ल शुभकामना देत हुए उज्जवल भविष्य के करिस कामना।
महाविद्यालय म मनाए गईस गौरव दिवस
छग सरकार के चार बछर पूरा होय म बिलासपुर सीपत के शासकीय मदनलाल शुक्ल महाविद्यालय म मनाए गईस गौरव दिवस, मस्तूरी युवा कांग्रेस अध्यक्ष सुनील पटेल ह भविष्य बर युवा मन ल करिस जागरूक, प्रदेश सरकार के जनकल्याणकारी योजना के छात्र मन के आघु म करे गईस बखान, बेहतर शिक्षा उपलब्ध कराना प्रदेश सरकार के मंशा, मौका म मस्तुरी उपाध्यक्ष देवेंद्र कृष्णन , एनएसयूआई वीरेंद्र सूर्या सहित सब्बो कार्यकर्ता अउ छात्र मन रहिस मौजूद.
