पढ़व छत्तीसगढ़ी म छत्तीसगढ़ के आज के जम्मों छोटे बड़े समाचार । 03 दिसंबर । 2025

छत्तीसगढ़ के समाचार छत्तीसगढ़ी म, पढ़व छत्तीसगढ़ के आज के हर छोटे बड़े समाचार अऊ रहव अप टू डेट

🔴माओवादी मुठभेड़, 12 नक्सली ढेर
बीजापुर जिला म आज सुरक्षा बल मन संग होय मुठभेड़ म बारह झिन माओवादी मन ह मारे गीन। उहें ए मुठभेड़ म सुरक्षा बल के तीन झन जवान मन घलो सहीद होगे हवय अउ दो झन दूसर जवान घायल होगे हे। जिला के पुलिस अधीक्षक डॉक्टर जितेन्द्र यादव ह बतईन कि बीजापुर-दंतेवाड़ा सीमा म माआवोदी मनके मौजूदगी के खूफिया सूचना मिले के बाद दंतेवाड़ा अउ बीजापुर डिस्ट्रिक्ट रिजर्व गार्ड-डीआरजी, स्पेशल टॉस्क फोर्स-एसटीएफ, कोबरा अउ सीआरपीएफ के संयुक्त टीम डहार ले तलाशी अभियान चलाय जात रिहीस। इही दउरान मुठभेड़ सुरू होगे। सुरक्षा बल अउ माओवादी मनके बीच आज बिहनिया ले रूक-रूक फायरिंग जारी रिहीस।
बस्तर रेंज के पुलिस महानिरीक्षक सुंदरराज पी. ह बतईन कि मउका ले अभी तक बारह झिन माओवादी मनके सव ल बरामद कर ले गेहे। एखर अलावा मउका ले रायफल अउ दूसर विस्फोटक सामग्री घलो जब्त करे गेहे।
ए मुठभेड़ म तीन जवान सहीद होगे हे। उहें, दू झन दूसर जवान घायल होय हे, जेला बीजापुर म प्राथमिक उपचार के बाद खतरा ले बाहिर बताय जात हे। ए इलाका म सुरक्षा के उपरहा बल भेजे गे हवय। क्षेत्र म सर्च ऑपरेशन चलत हे।

🔴 अंतर्राष्ट्रीय दिव्यांगजन दिवस
आज अंतर्राष्ट्रीय दिव्यांगजन दिवस हवय। राष्ट्रपति द्रौपदी मुर्मु ह नई दिल्ली म आयोजित राष्ट्रीय पुरस्कार समारोह म दिव्यांगजन के सशक्तिकरण म सुघ्घर प्रयास बर लोगन ल अउ संस्था मन ल राष्ट्रीय पुरस्कार प्रदान करीन। एमा छत्तीसगढ़ के धमतरी जिला के कुरूद निवासी बसंत विकास साहू घलो सामिल हे। श्री साहू ह उंखर असाधारण उपलब्धि अउ समाजिक योगदान बर सर्वश्रेष्ठ दिव्यांगजन श्रेणी के राष्ट्रीय पुरस्कार प्रदान करे गीस। ए मउका म राष्ट्रपति ह किहीन कि कोनों समाज ल सही अर्थ म तथे विकसित कहे जा सकत हे, जब दिव्यांग लोगन संग समान व्यवहार करे जाय। दिव्यांग होय के बावजूद बसंत साहू ह कला अउ समाज सेवा बर अपन जीवन ल समर्पित कर दे हवय। ओमन ह पाछु सत्ताईस बछर ले अपन भुजा म ब्रश बांधके जनजातीय संस्कृति के चित्रण करत हे। अंतर्राष्ट्रीय दिव्यांगजन दिवस म आज राज्यपाल रमेन डेका ह रईपुर के सेमरिया के कोपलवाणी श्रवण बाधित विद्यालय म राखे गे कार्यक्रम म सामिल होइन। ए दउरान ओमन ह ए स्कूल ले पास होय लइका मन ल सम्मानित करीन।

🔴 अंतर्राष्ट्रीय दिव्यांगजन दिवस
अंतर्राष्ट्रीय दिव्यांगजन दिवस के मउका म आज सूरजपुर जिला म राखे गे राज्य स्तरीय कार्यक्रम म महिला अउ बाल विकास समाज कल्याण मंत्री लक्ष्मी राजवाड़े सामिल होइन। ए मउका म ओमन किहीन कि दिव्यांग लोगन समाज के अनमोल सक्ति हे अउ उंखर सम्मान, अधिकार, अउ समान अवसर निश्चित करना राज्य सरकार के पहिली प्राथमिकता हे।

🔴 प्रधानमंत्री कार्यालय-सेवा तीर्थ
प्रधानमंत्री नरेन्द्र मोदी ह प्रधानमंत्री कार्यालय के नाव बदल के सेवा तीर्थ कर दे हवय। केन्द्रीय गृहमंत्री अमित शाह ह एक ठिन सोशल मीडिया पोस्ट म किहीन कि राजभवन अउ राजनिवास के नाव बदल के लोकभवन अउ लोक निवास करे जावत हे। ओमन ह एला एक श्रेष्ठ अउ विकसित भारत बनाय के दिसा म बड़े मील के पत्थर बतईन।

🔴संचार साथी ऐप
केन्द्रीय संचार मंत्री ज्योतिरादित्य सिंधिया ह विपक्ष के जासूसी के आरोप ल खारिज करत किहीन कि संचार साथी ऐप ले जासूसी संभव नइ हे। आज लोकसभा म एक ठन प्रश्न के उत्तर देवत श्री सिंधिया ह बतईन कि उपयोग कर्ता अपन सुविधा के अनुसार पंजीकरण करके ऐप ल सक्रिय कर सकत हे अउ एखर फायदा ले सकत हे।

🔴 मंत्रिमंडल-निर्णय
मुख्यमंत्री विष्णुदेव साय के अध्यक्षता म आज मंत्रालय म राज्य मंत्रिमंडल के बइठका होइस। बइठका म राज्य के घरेलू विद्युत उपभोक्ता मन ल बिजली बिल म छूट देके संगेच कतकोन दूसर बड़े फैसला करे गीस।

बइठका के बाद पत्रकार मन ले चर्चा करत उपमुख्यमंत्री अरूण साव ह बतईन कि राज्य के घरेलू विद्युत उपभोक्ता मन ल बिजली बिल म राहत दे बर मुख्यमंत्री ऊर्जा राहत जन अभियान प्रदेस म एक दिसंबर ले लागू होगे हे। एमा छत्तीस लाख घरेलू उपभोक्ता मन ल दू सौ यूनिट हर महीना तक बिजली बिल म पचास प्रतिसत के छूट के फायदा मिलही। ए फायदा चार सौ यूनिटी तक खपत वाले छह लाख उपभोक्ता मन ल मिलही।
एखर अलावा राज्य मंत्रिमंडल के बइठका म स्थानीय लघु अउ सूक्ष्म उद्योग ले खरीदी ल प्रोत्साहन दे बर अउ जेम पोर्टल म खरीदी ल आसान करे बर संसोधन करे के फइसला ले गीस। उहे मंत्रिपरिषद ह छत्तीसगढ़ निजी विश्वविद्यालय स्थापना अउ संचालन संसोधन विधेयक अउ छत्तीसगढ़ दुकान अउ स्थापना संसोधन विधेयक के प्रारूप के घलो अनुमोदन करीन।

🔴 लोकसभा-रेल परियोजना
अंबिकापुर संघरा छत्तीसगढ़ के कतकोन रेल अधोसंरचना ल सृदृढ़ बनाय बर केन्द्र सरकार डहार ले हाल के बछर म रेल परियोजना ल पूरा करे बर तेजी ले काम करे जावत हे। ए जानकारी आज लोकसभा म सरगुजा सांसद चिंतामणी महराज डहार ले पूछे गे एक ठन सवाल के जवाब म रेल मंत्री अश्विनी वैष्णव ह दीन। श्री वैष्णव ह बतईन कि अस्सी किलोमीटर लंबा बोरिडांड-अंबिकापुर दोहरीकरण परियोजना म काम सुरू होगे हवय। उहें, अंबिकापुर-रामानुंजगंज-बरवाडीह नवा रेललाइन अउ दू सौ बासठ किलोमीटर लंबा रामानुजगंज-गढ़वा रोड सहायक लाइन के परियोजना रिपोर्ट बन गे हवय। अइसने, दू सौ अट्ठारह किलोमीटर लंबा सरडेगा-पत्थलगांव-अंबिकापुर नवा रेललाइन परियोजना के रिपोर्ट ल घलो पूरा कर ले गेहे। ओमन बतईन कि हाल के बछर म छत्तीसगढ़ बर रेल बजट आवंटन म बने बढ़ोतरी होय हे।

🔴 एसआईआर-विशेष कार्यक्रम
मतदाता सूची के विशेष गहन पुनरीक्षण अभियान-एसआईआर म प्रादेशिक समाचार एकांश रायपुर डहार ले तैयार करे गे विशेष कार्यक्रम के प्रसारण काली चार दिसंबर के बिहनिया नौ बजके पचपन मिनट ले दस बजे तक करे जाही। ए कार्यक्रम अपलिंक म रइही अउ एखर प्रसारण छत्तीसगढ़ के सबो आकाशवाणी केन्द्र मन ह रिले करही।

🔴 हवाई प्रेषण सेवा
रायपुर के स्वामी विवेकानंद विमानतल ले देस के आने-आने सहर बर आउटबाउंड कार्गो सेवा के माध्यम ले डाक तैली के प्रेषण फेर सुरू कर दे गेहे। भारतीय डाक विभाग अउ केन्द्रीय नागरिक उड्डयन मंत्रालय के बीच होय समझौता म ए हवाई प्रेषण सेवा इक्कीस नवंबर ले सुरू करे गेहे।

🔴 क्रिकेट
भारत अउ दक्षिण अफ्रीका के बीच तीन ठन एकदिवसीय क्रिकेट मैच के श्रृंखला के दूसर मैच आज रईपुर के सहीद वीरनारायण सिंह अंतर्राष्ट्रीय क्रिकेट स्टेडियम म खेले जावत हे। दक्षिण अफ्रीका ह टॉस जीतके भारत ल पहिली बल्लेबाजी करे बर आमंत्रित करीस। भारत ह निर्धारित पचास ओवर म पांच विकेट के नुकसान म तीन सौ अंठावन रन बनईस। भारत कोति ले विराट कोहली अउ रितुराज गायकवाड़ ह सानदार बल्लेबाजी करत शतकीय पारी खेलीन। उहें, कप्तान के.एल. राहुल ह छियासठ रन के योगदान दीन। दक्षिण अफ्रीका कोति ले मार्को यानसन ह दू विकेट लीन।
जीत बर मिले तीन सौ अंठावन रन के लक्ष्य के पीछा करत दक्षिण अफ्रीका की टीम ह समाचार लिखे जाय तक पांच ओवर म 3 विकेट के नुकसान म 241 रन बना लेहे। भारत फिलहाल श्रृंखला म एक-शून्य ले आगे हवय।

🔴 गांधी शिल्प बाजार
नई दिल्ली के एम्पोरियम कॉम्प्लेक्स म छत्तीसगढ़ हस्तशिल्प विकास बोर्ड डहार ले गांधी शिल्प बाजार हस्तशिल्प प्रदर्शनी के आयोजन करे जावत हे। ए प्रदर्सनी के उद्घाटन काली छत्तीसगढ़ भवन के आवासीय आयुक्त श्रुति सिंह ह करीन। प्रदर्सनी म देस के आने-आने राज्य ले आए सौ झन सिल्पकार मन डहार ले आकर्षक हस्तशिल्प कला, वस्तु अउ कलाकृति के प्रदर्सन एके संघरा करे गे हवय।

छत्तीसगढ़ बड़ी खबरें (छत्तीसगढ़ी सार)
▶ बिलासपुर रेल हादसा के बाद रेलवे बोर्ड ह मंझ SECR ला नवा प्रिंसिपल चीफ सेफ्टी ऑफिसर बना के अनूप सतपथी के जिम्मा दे दिस, सुरक्षा के इंतजाम ला अउ टाइट करे बर तैयारी चालू हे.​

▶ बस्तर मं भयंकर मुठभेड़ मं 12 नक्सली मार गिरिन, तीन DRG जवान शहीद होगे, सीएम साय कहिन के जवान मन के बलिदान बेकार नई जाही, नक्सलवाद खतम होबार घड़ी अब दूर नई ये.​

▶ राज के शासन काम बर ई‑गजट ऑनलाइन पोर्टल सुरू हो गे, अब सरकार के सब्बो अधिसूचना कागज के जगा सीधे डिजिटल रूप मं जनता तक पहुँचही.​

▶ ग्रैंड ग्रुप के चेयरमैन गुरुचरण सिंह होरा के माय प्रकाश कौर होरा के देहांत हो गे, रायपुर समेत कई ठन ठिकाना मं शोक के माहौल हे.​

▶ नक्सली मुठभेड़ वाले इलाका मं पुलिस पूरे सर्च ऑपरेशन चालू रखिस, मारे गे माओवादियन के लाश अउ हथियार जप्त करके जंगल के चप्पा‑चप्पा खंगाले जात हे.​

▶ पूर्व राष्ट्रपति रामनाथ कोविंद रायपुर पहुँचिन, PMO के नाम बदले के सवाल मं कहिन के ये राजनैतिक बात आय, जे बदले गे हे वोला वो सही मानथें.​

▶ NMIMS यूनिवर्सिटी के टीम मुख्यमंत्री साय से मिलके नया रायपुर के एडुसिटी मं कैंपस खोलइ के प्रस्ताव दे हे, जे ले उहां पढ़ई‑लिखई के नवा मौका बनही.​

▶ नवा गाइडलाइन मं बृजमोहन अग्रवाल के चिट्ठी ऊपर राजनीति तेज होगे, मंत्री जायसवाल कहिन ये सांसद के अधिकार आय, त कांग्रेसी नेता विकास सवाल उठावत हें के संसद मं मोदी‑शाह ले सीधे बात काबर नई करथें.​

▶ रायपुर मं एक श्रमिक के कटी उंगरी ऊपर डॉक्टर मन नस‑नस जोड़के उंगरी बचा दिन, अब ओकर रोजी‑रोटी अउ काम दूनों फिर ले चले सकही.​

▶ CG मं 108 एंबुलेंस सेवा संकट मं हे, काबर के ड्राइवर‑स्टाफ ला दू महीना ले तनखा नई मिले हे, जेकर बाद अब गाड़ी मन के पहिया रुकइ के स्थिति बनत हे.

▶ खरीदी केंद्र मं खराब कांटा रखके किसान मन ले धान तौल मं प्रति क्विंटल करीब 5 किलो तक कटोती होवत हे, कांग्रेस चेतावनी देके कहिस के कार्रवाई नई होही त आंदोलन करही.​

▶ CGPSC 2024 के टॉप 10 परीक्षार्थी मुख्यमंत्री साय ले भेट करके आभार जतान, सीएम कहिन के अब प्रशासन मं रहिके जनता के भला बर काम करन बर खुदला तैयार रखव.​

▶ शराब दुकान मं मिलावटी दारू अउ रिश्ता‑नाता वाला मन के भर्ती के आरोप लगत हें, भाजपा नेता आबकारी अफसर के खिलाफ मंत्री अउ आयुक्त कोती शिकायत करिन, ADEO ये आरोप ला बेबुनियाद कहिथे.​

▶ विश्रामपुर म कोयला खदान के एक्सटेंशन के विरोध मं गुस्साय ग्रामीण मन लाठी‑डंडा, गुलेल, कुल्हाड़ी ले पुलिस ऊपर हमला कर दिन, झड़प मं कई पुलिस वाले अउ ग्रामीण घायल होय के खबर आय.​

▶ साय कैबिनेट बैठक मं फैसला होइस के अब 100 नई, 200 यूनिट तक महीना के घरेलू खपत ऊपर बिजली बिल मं 50 फीसदी तक छूट मिलही, जेकर फायदा छोटे उपभोक्ता मन ला जादा दिखही