छत्तीसगढ़ के आज दिनभर के हर खबर म मात्र 2 मीनट म हो जावा अपडेट, पढ़व छत्तीसगढ़ के खबर फटाफट

क्यूआर कोड ले होही मकान के पहिचान
न्यायधानी के मकान मन ल मिलही अपन हाईटेक पहिचान, बिलासपुर स्मार्ट सिटी ह नगर निगम सीमा म अवईया घर मन म डिजिटल कोड नंबर लगाए के तईयारी करिस शुरू, घर बईठे जमा करे जा सकही टैक्स, स्मार्ट सिटी प्रोजेक्ट म टैक्स वसूली ल हाईटेक करे के हे तईयारी।

सर्व आदिवासी समाज करिस किनारा
नारायणपुर म चर्च तोड़फोड़ मामला म गहमागहमी के माहौल, चारों कति ले तोड़फोड़ अउ हंगामा के बाद सर्व आदिवासी समाज प्रेस कॉन्फ्रेंस कर दिहिस बड़का बयान, कहिस एमा सर्व आदिवासी समाज के नई हे कोई हाथ, हो सकत हे कोई विशेष संगठन।

तेंदुआ के हमला ले महिला के मौत
मनेन्द्रगढ़ जनकपुर परिक्षेत्र के कुंवारी बीट के ग्राम सिंगरौली के पुरनिहापारा म आदमखोर हो चुके तेंदुआ ह एक महिला उपर हमला कर उतारिस मौत के घाट, इहां अब तक 2 महिला के हो चुके हे मौत, उहें 1 एक लईका हो चुके हे घायल, लगातार तेंदुआ के आतंक ले दहशत म हे ग्रामीण।

अपहृत 2 ठेकेदार ल नक्सली करिन रिहा
बीजापुर नक्सल इलाका ले अपहृत 4 पेटी ठेकेदार म से 2 ल माओवादी मन करिन रिहा, परिजन अउ रिश्तेदार रिहाई के करिन पुष्टि, उहें अब भी नक्सली के कब्जा म हे 2 लोगन।

शोरूम म घुसिस ट्रैक्टर ट्रॉली
रायपुर मार्ग म सुंदर नगर कना स्थित होंडा शो रुम म ट्रैक्टर ट्रॉली घुसे ले बाहिर खड़े 4 बाइक होईस क्षतिग्रस्त, ट्रैक्टर म 2 ट्रॉली ल टोचन करके बेमेतरा ले रायपुर के कति जावत रहिस एक व्यक्ति, ट्रैक्टर के टोचन टूट जाए ले होईस घटना, बाल-बाल बांचिस कर्मचारी।

सरपंच निकलिस अपन पिता के हत्यारा
अंबिकापुर सरस्वतीपुर निवासी फेंकू सिंह के संदिग्ध परिस्थिति म घर म मौत होए मामला के पुलिस सुलझाईस गुत्थी, मृतक के सरपंच पुत्र अर्जुन सिंह ल गिरफ्तार कर भेजिस जेल, पार्टी के दौरान विवाद म सरपंच ह अपन पिता के करिस पिटाई, संदिग्ध हालत म दूसर दिन होईस मौत।

डबरी म डूबे ले किशोर के मौत
बेमेतरा थाना क्षेत्र के ग्राम पंचायत तिवरैया म डबरी म नहाए के दौरान एक किशोर के होईस मौत, तिवरैया निवासी 16 बछर के प्रेम साहू के मिर्गी के दौरा आए म तालाब म डूबे ले गईस जान।

कोरबा के 2 गुरूजी उपर गिरिस गाज
कोरबा म शराब के नशा म स्कूल आए अउ उपस्थिति पंजी म हस्ताक्षर नई करईया 2 शिक्षक उपर गिरिस गाज, शासकीय प्राथमिक शाला सरसाडेवा म पदस्थ सहायक शिक्षक श्याम कुमार परमार अउ पोड़ी उपरोड़ा म पालढुरेना के एलबी चंद्रलाल सांडिल ल करे गईस निलंबित।

घर म घुसके पति-पत्नी के पिटाई
बिलासपुर सकरी थाना क्षेत्र म आदतन बदमाश ह दबंगई दिखात घर म घुसके युवक अउ ओखर पत्नी के साथ करिस मारपीट, बाइक गिरवी रखे के शिकायत म जमके मचाईस हंगामा, बाजारपारा निवासी हिस्ट्रीशीटर विक्की पाण्डेय ल अब करे जाही जिलाबदर।

2 दिवसीय प्रो कबड्डी के होईस आयोजन
कांकेर अंतागढ़ म युवा क्लब समिति कोड़ा खुर्री के तत्वधान म 2 दिवसीय प्रो कबड्डी के रखे गए रहिस आयोजन, जेमा प्रथम विजेता टीम बरहेली, द्वितीय सोनादई, तृतीय गुलाल बोड़ी अऊ महिला वर्ग कुर्सी दौड म प्रथम स्थान करीस प्राप्त, खिलेश्वरी तुलावी अऊ शैलेन्दी गावड़े अउ विजेता टीम ल मुख्य अतिथि के हाथ ले करे गईस पुरस्कृत।

कोटवार संघ के चुनाव होईस सम्पन्न
बिलासपुर सीपत तहसील कोटवार संघ के चुनाव धनियां सामुदायिक भवन म होइस सम्पन्न, सर्वसम्मति ले भुलनदास ल बनाए गईस अध्यक्ष, द्वारिका ल करे गईस कोषाध्यक्ष नियुक्त, प्रेमदास ल उपाध्यक्ष अउ हृदयदास ल सचिव पद के देहे गईस जिम्मेदारी, नवा कार्यकारिणी गठन के बाद कोटवार मन के कई समस्या समेत संघ हित बर कई महत्वपूर्ण विषय म करे गईस चर्चा, नवनियुक्त पदाधिकारी मन ल मिलिस शुभकामना, मौका म लच्छी वर्मा सहित सीपत तहसील के सब्बो 74 कोटवार मन होइन शामिल।

लाइवलीहुड कॉलेज के गूंजिल मामला
विधानसभा म लाइवलीहुड कॉलेज म ट्रेनिंग के नाव म डीएमएफ फंड के राशि के बंदरबांट के गूंजिस मामला, सत्तापक्ष अउ विपक्ष के आरोप-प्रत्यारोप के बीच स्पीकर डॉक्टर चरणदास महंत ह मंत्री ल पाछू सरकार के 5 साल के दौरान अउ वर्तमान सरकार के कार्यकाल म अब तक खर्च के जांच कराए के दिहिस निर्देश।

छत्तीसगढ़ खिलाड़ी के चयन के उठिस मुद्दा
विधानसभा शीतकालीन सत्र के दूसर दिन 36वां राष्ट्रीय खेल आयोजन म छत्तीसगढ़ के खिलाड़ी के चयन के उठिस मुद्दा, अजय चंद्राकर सवाल करत कहिस ओलंपिक संघ ल 35 लाख के देहे गए हे राशि, लेकिन संघ ह महज 1 लाख करिस खर्चा, खेल मंत्री उमेश पटेल जाँच कराके निराकरण के कहिस बात।

चंदेल के कांग्रेस सरकार उपर गंभीर आरोप
नेता प्रतिपक्ष नारायण चंदेल प्रदेश कांग्रेस सरकार उपर गंभीर आरोप लगात कहिस ओबीसी वर्ग ल आरक्षण नई देना चाहत हे भूपेश सरकार, पहली अपन ही नेता ले हाईकोर्ट म याचिका डलवा के ओबीसी आरक्षण उपर लगवाईस रोक, अब जान बूझके क्वांटिफिएबल डाटा आयोग के रिपोर्ट ल नई करत हे सार्वजनिक।