छत्तीसगढ़ के आज दिनभर के हर खबर म मात्र 2 मीनट म हो जावा अपडेट, पढ़व छत्तीसगढ़ के खबर फटाफट
8 जनवरी ले छत्तीसगढ़िया ओलंपिक शुरू
छत्तीसगढ़िया ओलंपिक राज्य स्तरीय प्रतियोगिता के 8 ले 10 जनवरी तक होही आयोजन, राजधानी के सरदार बलबीर सिंह जुनेजा इंडोर स्टेडियम म होही उद्घाटन समारोह, रायपुर के कई खेल मैदान म करे जाही आयोजित।
विधानसभा उपाध्यक्ष के नाव तय
बस्तर के केशकाल ले दूसर बार के विधायक संतराम नेताम छत्तीसगढ़ विधानसभा के होही नवा उपाध्यक्ष, विधायक दल के बईठक म बनिस सहमति, एक ले जादा नामांकन आए म 5 जनवरी के विधानसभा उपाध्यक्ष के होही चुनाव।
बेलगाम वाहन ह मचाईस तबाही
रायपुर के करीब आरंग म नशा म धुत चालक ह बस्ती म घुसाईस सीमेंट ले भरे ट्रेलर, घर के बाहिर खड़े बाइक ट्रेलर के चपेट म आए ले होईस चकनाचूर, साथ ही कई मकान क्षतिग्रस्त, आरोपी चालक ल गिरफ्तार कर जांच म जुटिस पुलिस।
पेट्रोल पंप म बदमाश मन करिस फायरिंग
बिलासपुर कोटा लोरमी मार्ग के ग्राम लखोदना चंगोरी कना स्थित पुष्कर पेट्रोल पंप म लूट के इरादा ले 3 नकाबपोश युवक मन चलाईस गोली, दहशत म भागिन कर्मचारी, CCTV म कैद होईस घटना, आरोपी मन के तलाश म जुटिस पुलिस।
तलवार ले केक काटना परिस भारी
बिलासपुर सिविल लाइन थाना क्षेत्र के अमेरी चौक म बीच रास्ता म बर्थडे सेलिब्रेट करत 3 युवक ल पुलिस करिस गिरफ्तार, युवक सरेराह जन्मदिन मनाके तलवार ले काटत रहिस केक, बर्थडे ब्वॉय समेत 3 दोस्त ल दबोचिस पुलिस।
गला घोंट के माता-पिता बेटा के करिस हत्या
दुर्ग के कोनका गांव म सियान माता पिता ह अपन बेटा के करिस हत्या, घरवाला मन संग मिलके बेटा के गला दबाके उतारिस मौत के घाट, धमधा पुलिस सब्बो आरोपी ल करिस गिरफ्तार, मृतक गंगाधर पटेल दारू बर पईसा मांगके आए दिन करत रहिस झगड़ा।
पईसा के लालच म पिता के हत्या
कोरबा रजगामार चौकी क्षेत्र म बालको के रिटायर्ड कर्मचारी के हत्या मामला म पुलिस ह आरोपी बेटा ल करिस गिरफ्तार, भुलसीडीह के झोरखी फार्म हाउस म पईसा के लालच म बेटा राजेश चौबे ह टंगिया ले बुजुर्ग बालेश्वर चौबे के करे रहिस हत्या।
हाईवा के टक्कर ले एक्टिवा सवार के मौत
बिलासपुर मस्तूरी थाना क्षेत्र के किरारी मोड़ स्थित पेट्रोल पंप कना तेज रफ्तार हाईवा के टक्कर ले एक्टिवा सवार अधेड़ के होईस मौत, हाईवा के नीचे दबे शव ल जैक लगाके निकालना परिस बाहिर, जांजगीर-चांपा सोनसरी निवासी भोला राठौर लहुटत रहिस गांव।
ऑनलाइन क्रिकेट सट्टा के भंडाफोड़
बलौदाबाजार-भाटापारा पुलिस बड़का कार्रवाई करत ऑनलाइन क्रिकेट सट्टा के करिस भंडाफोड़, कृष्णा विहार कालोनी म ऑनलाइन क्रिकेट सट्टा खेलावत 3 आरोपी ल करिस गिरफ्तार, 5 नग मोबाइल, नगदी रकम जब्त, त उहें 7 लाख के ट्रांजैक्शन के चलिस पता।
क्रेशर म करेंट के झटका ले मजदूर के मौत
सारंगढ़-बिलाईगढ़ गुडेली क्षेत्र के एक क्रेशर म करेंट के झटका ले मजदूर के होईस मौत, क्रेशर संचालक ह परिजन अउ पुलिस ल नई दिहिस सूचना, रायगढ़ पुलिस ले घटना के रिपोर्ट आए के बाद पुलिस जांच कर वैधानिक कार्रवाई के कहत हे बात, परिजन अउ ग्रामीण म हे आक्रोश।
प्रदेश म मौसम के बदलिस मिजाज
प्रदेश म मौसम के बदलिस मिजाज, अधिकांश इलाका म छाए हे बदली अउ होवत हे हल्का बरसा, आज छत्तीसगढ़ म दिन भर बादल छाए रहे के संभावना, जशपुर, कोरिया, सरगुजा, सूरजपुर, बलरामपुर, पेंड्रा रोड अउ कोरबा म कोहरा ल लेके अलर्ट जारी, प्रदेश म 2 दिन तक कोहरा के चेतावनी, शुक्रवार ले ठंड बाढ़े के आसार।
ट्रक-पिकअप म भिड़ंत, ड्राइवर के मौत
कांकेर चारामा थाना क्षेत्र NH-30 म झिपाटोला गांव कना तेज रफ्तार ट्रक अउ पिकअप के होईस भिड़ंत, घना कोहरा के चलत आमने-सामने टकराईस दूनों गाड़ी, पिकअप के सामने के हिस्सा बुरा तरह होईस क्षतिग्रस्त, इलाज के दौरान पिकअप ड्राइवर ह टोरिस दम।
चाउर वितरण म घोटाला के आरोप
प्रधानमंत्री गरीब कल्याण योजना म चाउर वितरण म घोटाला उपर सदन म जोरदार होईस हंगामा, बीजेपी नेता धरमलाल कौशिक चाउर वितरण म 5127 करोड़ के घोटाला के लगाईस आरोप, खाद्य मंत्री अमरजीत भगत आरोप ल सिरा से करिस खारिज।
पेड़ ले टकराईस अनियंत्रित कार, 1 के मौत
मनेंद्रगढ़ जनकपुर के ग्राम गाजर म पेड़ ले टकराईस अनियंत्रित कार, हादसा म 1 के होईस मौत, त 2 गंभीर रूप से हे घायल, ग्रामीण मन के मदद ले घायल मन ल घंटों मसकद के बाद कार ले निकाले गईस बाहिर, सीट बेल्ट लगाए, एयर बैग के बावजूद नई बांचिस जान।
कथा स्थल ले 12 महिला गिरफ्तार
बलौदाबाजार के कोकड़ी गांव म आयोजित शिव महापुराण कथा ज्ञान यज्ञ सप्ताह कार्यक्रम म हजारों के संख्या म उमड़त हे श्रद्धालु, ए दौरान असामाजिक तत्व चोरी के घटना ल देवत हे अंजाम, कथा स्थल ले 12 संदिग्ध महिला ल गिरफ्तार कर भेजे गईस जेल।
तेंदुआ ह 50 ले जादा जानवर के लिहिस जान
नारायणपुर के हांदावाड़ा जलप्रपात के आस पास के इलाका म बड़का तादात म घुसिस तेंदुआ, तेंदुआ के झुंड ह 50 ले जादा जानवर उपर करिस हमला, इलाका म दहशत के बनिस माहौल, जंगल ले जानवर मन के चीखे-चिल्लाए के आवाज ले गांव म मचिस अफरा-तफरी, मौका म पहुंचिस वन अमला।
8 करोड़ के लागत ले संवरही सिविक सेंटर
भिलाई शहर के हृदय स्थल कहे जाए वाला सिविक सेंटर के आधुनिक तरीका ले करे जावत हे सौंदर्यीकरण, करीब 8 करोड़ के लागत ले सिविक सेंटर के माइल स्टोन रथ पार्क के करे जाही कायाकल्प, अउ सड़क, नाली ल सुधारत लोगन ल देहे जाही हाइटेक सुविधा, नगर विधायक अउ महापौर करिस निरीक्षण।
सोनू ल प्रदेश कार्यकारिणी सदस्य के जिम्मेदारी
सोनू निर्मलकर ल मिलिस अभाविप म पुनः प्रदेश कार्यकारिणी सदस्य के जिम्मेदारी, कोरबा म आयोजित अधिवेशन के आखरी दिन प्रदेश अध्यक्ष अमित बघेल ह करिस घोषणा, एखर पहली सोनू ह संभाल चुके हे नगर मंत्री पद के दायित्व, नियुक्ति म अखिल भारतीय विद्यार्थी परिषद सहित अन्य कार्यकर्ता मन बधाई देत हुए करिस उज्ववल भविष्य के कामना।
दर्राभांठा म श्रीमद्भागवत कथा के आयोजन
बिलासरपुर के दर्राभांठा म चलत हे श्रीमद्भागवत कथा के आयोजन, भागवत कथा सुने बर उमड़थे श्रद्धालु मन के जनसैलाब, लोरमी सरईपतेरा के पं. राजू महाराज ह करत हे श्रीमद भागवत कथा के वाचन, सुदामा चरित्र, परीक्षित मोक्ष कथा के करे गईस वर्णन, कृष्ण रूखमणी विवाह के मनोरम झांकी ह श्रद्धालु मन बर रहिस आकर्षण के केंद्र, राजनीतिक दल के लोगन पहुंच के भागवत कथा के लेवथे लाभ, आयोजन ल सफल बनाए बर चंद्राकर परिवार सहित ग्रामवासी मन के योगदान हे सराहनीय।
गांव-गांव म राजस्व शिविर के आयोजन
राज्य सरकार तुंहर दुआर के तहत गांव-गांव म करे जावथे राजस्व शिविर के आयोजन, कलेक्टर के निर्देश म तहसील स्तर म करे जावथे शिविर के आयोजन, गांव-गांव म जाति निवास अउ आमदनी बनाए के लेहे जावथे आवेदन, नायब तहसीलदार राहुल कौशिक पटवारी अउ ग्राम के जनप्रतिनिधि मन मिलके बिलासपुर के सीपत कौड़िया म करिस जाति निवास अउ आमदनी के वितरण, ग्रामीण मन के समस्या ल गांव म ही निपटाना सरकार के हे मंशा, मौका म स्कूली विद्यार्थी के संग कोटवार मन रहिन मौजूद।
ग्राम पौसरी म जनसुनवाई के जबरदस्त विरोध
बलौदाबाजार के सिमगा के ग्राम पौसरी म 5 जनवरी के होवईया जनसुनवाई के ग्रामीण मन करीस विरोध, फैक्ट्री के विरोध म ग्रामीण मन निकालिन जन आक्रोश रैली, गांव पौसरी म खुलईया फैक्ट्री के विरोध म हजारो के संख्या म ग्रामीण मन सबो गली म निकालीस रैली, ग्रामीण लोगन म दिखीस जबरदस्त आक्रोश
