🆅🅸🅳🅴🅾 रतनपुर : खारंग जलाशय खुटाघाट बांध के टापू म बनही ग्लास हाउस, प्रवासी पक्षी मन के बसेरा खतरा म

गुरुदेव सोनी । बिलासपुर । पर्यटन के ग्राफ म यदि देखे जाय त सबले ऊपर के नाव बिलासपुर जिला के पर्यटन नगरी रतनपुर के खुटाघाट बांध खारंग जलाशय के ही आथे, जेन ह प्राकृतिक रूप ले पर्वत श्रृंखला ले घिरे इंखर सुंदरता म चार चांद लगा देथे ये ह वनाच्छादित हरीतिमा के चादर ओढ़े आसपास के क्षेत्र म अपन बेदाग सुंदरता बर मशहूर हे, ये खूंटाघाट बांध म चारों तरफ पानी मध्य म एक सुंदर टापू प्राकृतिक रूप ले विद्यमान हे जिंहा विकास कार्य के तहत ये टापू म बगीचा, ग्लास हाउस अउ रेस्टोरेंट आदि के निर्माण करे के खातिर आज भूमि पूजन करे गइस, ये भूमि पूजन म छत्तीसगढ़ टूरिज्म बोर्ड के अध्यक्ष अटल श्रीवास्तव के अध्यक्षता म भूमि पूजन के कार्यक्रम ह सम्पन्न होइस जिंहा सैकड़ों के तादाद म कांग्रेस के कार्यकर्ता अउ आमजन मन उहां उपस्थित रहिस, अउ ये निर्माण कार्य म भूमिपूजन के साक्षी बनिस।

बता दन के ये सुंदर टापू म जिंहा सैकड़ो के तादात म तरह तरह के पेढ़ पौधा उगे हे, जेन कई प्रकार के पक्षी मन बर एखर ले सुरक्षित अउ बेहतर जगह भला अउ कहाँ हो सकत हे, जिंहा ये पक्षी मन स्वतंत्र अउ निडर होके अपन बसेरा बना के निवास करथे अउ ये टापू ही मात्र एक अइसन जगह हे जिंहा मानसून के संकेत देने वाला एक पक्षी जेन ह जंगहिल के नाम ले जाने जाथे जेन ह हर बछर मानसून आय के ठीक पहेली ये निश्चित स्थान टापू म रूस, इंडोशिया, श्री लंका जईसे हजारों किलोमीटर के यात्रा करके इहाँ पहुँचथे , अउ ये पक्षी मन ल देखके किसान मन के चेहरा म चमक आ जाथे अउ खुशी ले झूम उठथे, किसान मन ल ये संकेत मिल जाथे के अब जल्द ही मानसून अवईया हे, काला काला मानसूनी बादल के संग अवइया ये पक्षी मन के जीवन म अब संकट के बादल मंडराय लगे हे जेन ह अपन प्रवास काल के दौरान तीन महीना इहाँ बिताय के बाद सितंबर महीना के आखिरी म वापिस लहुट जाथे, जेमा पक्षी प्रेमी मन के अइसन मानना हे के जिहां एक तरफ ये टापू म ग्लास हाउस अउ रेस्टोरेंट के निर्माण होही त दूसर तरफ वाइल्ड लाइफ प्रभावित होही

ये प्राकृतिक टापू म ग्लास हाउस अउ रेस्टोरेंट के निर्माण म पक्षी प्रेमी अउ आम आदमी पार्टी के कार्यकर्ता मन म काफी निराशा देखे बर मिलत हे, जेमा उंखर द्वारा विरोध करे जावत हे, अउ उंखर मानना हे के ये निर्माण ले प्रवासी पक्षी मन के आशियाना उजड़ जाहि जिंहा हजारों के संख्या म ये प्रवासी पक्षी मन आके अपन वंश वृद्धि करथे अउ ये निर्माण कार्य म उंखर द्वारा रोक लगाय के मांग करे जावत हे।