🆅🅸🅳🅴🅾 तिल्दा-नेवरा : शक्ति आराधना के महापरब चैत्र नवरात्र आज ले शुरू,110 बछर बाद बनत हे दुर्लभ संयोग

केशव पाल । शक्ति के भक्ति के महापरब चैत्र नवरात्र आज ले शुरू होगे हे। देवी मंदिर मन म आज ले श्रद्वालु मन के पहुंचना घलो चालू होगे हे। चैत्र शुक्ल के प्रतिपदा तिथि ले चैत्र नवरात्रि के शुभारंभ होथे। ए बछर 22 मार्च ले 30 मार्च तक नवरात्र परब मनाय जाही। नवरात्रि के ए नौ दिन तक मां दुर्गा के अलग-अलग नौ स्वरूप के आराधना होही। देखव वीडियों

रायपुर के तिल्दा-नेवरा क्षेत्र के सबो छोटे-बड़े देवी मंदिर आज ले आस्था के ज्योति ले जगमग होगे हे। पूरा नौ दिन तक मंदिर अउ घर मन म शंख, घड़ियाल के धुन के संग संध्या बिहनिया मातारानी के आरती होही। आज अभिजीत मुहूर्त म घटस्थापना के संग मनोकामना ज्योति प्रज्जवलित करे गइस। त उंहे घर मन म घलो लोगन जोत जँवारा बोंय हाबय। ए दौरान भक्त मन नवरात्रि के नौ दिन तक व्रत रखहीं अउ पारण के संग एकर समापन करही। पंचमी के दिन माता के विशेष श्रृंगार करे जाही त उंहे अष्टमी तिथि म यज्ञ हवन के कार्यक्रम सम्पन्न होही। इहू बार मातारानी के दरबार ल आकर्षक झालर अउ तोरन पताका ले सजाय गेहे। भक्त मन सीधा गर्भ गृह तक जाके माता के दर्शन पूजन कर सकय एकर बर विशेष तैयारी घलो समिति वाला मन करे हे। आज ले देवी मंदिर मन म जस सेवागीत के धूम रइही। हिन्दू पंचांग के अनुसार ए बछर ब्रह्म योग म मां दुर्गा नौका म सवार होके आही अउ बिदाई हाथी म होही। ए बार चैत्र नवरात्र म 110 बछर बाद दुर्लभ शुभ योग संयोग बनत हे। ए बार नवरात्रि पूरा नौ दिन के रइही। ज्योतिष मन के मानिन त नवरात्र म प्रतिपदा के दिन पांच राजयोग बनत हे। जेकर ले शक्ति उपासना के परब चैत्र नवरात्र के महत्व अउ बाढ़ गेहे।