🆅🅸🅳🅴🅾 रतनपुर : विलक्षण हे गिरजाबंद के हनुमान मंदिर, “हनुमान जन्मोत्सव महापर्व विशेष”

प्राचीन काल म जेन राजा महाराजा होइस उंखर सामाजिक व्यवस्था बहुत ही धर्म प्रधान रहीस होही, जेखर सबूत इहाँ स्थापित विभिन्न समकालीन देवी देवता मन के मंदिर मन ले मिलथे, अउ प्रायः विभिन्न काल के राजा मन रतनपुर म अपन-अपन प्रभाव छोड़त गए हे, आज भी एखर प्रमाण स्वरूप रतनपुर म अनेक देवी देवता मन के मंदिर स्थापित हे, रतनपुर ल यदि धार्मिक नजरिया ले देखे जाए त इहां विभिन्न मंदिर मन के पूरा श्रृंखला विद्यमान हे, त बात करबो रतनपुर के गिरजावन म प्रतिष्ठित सिद्धपीठ सिद्धिदायक हनुमान मंदिर के, जिंहा सच्चा मन ले आके पूजा आराधना करे ले हनुमानजी एक ही बार म भक्त मन के मनोकामना ल पूर्ण कर देथे, रतनपुर गिरजावन म सिद्धिदायक सिद्धपीठ दक्षिणमुखी हनुमान जी के मंदिर, जेखर कीर्तिगाथा देश विदेश तक फइले हुए हे, ये प्राचीन ऐतिहासिक मंदिर म हनुमानजी के जेन विग्रह विराजमान हे वोहा अपन निर्माण शैली के आधार म संभवत पूरा देश के अकेला अउ अनूठा मूर्ति होही, जेमा आसपास कहीं अउ अइसनहा मूर्ति देखे बर नई मिलय, ये प्रतिमा म जेन मारुति नंदन के स्वरूप हे, ओमा भगवान श्रीराम अउ लक्ष्मण जी उंखर कंद्धा म बइठे हुए हे, अउ उंखर पांव के नीचे अहिरावण दबे हुए हे, अउ ये ए प्रतिमा रामचरितमानस के वो प्रसिद्ध कथा ल मूर्त रूप कर देथे, जेखर अनुसार अहिरावण भगवान श्री राम अउ लक्ष्मण जी ल अपन आराध्य कुलदेवी कुमदा के समक्ष बलि देहे बरदेने के पाताल लोक ले जाय रहिथे। अउ ये मूर्ति के ठीक सामने म प्रभु श्री राम अउ सीता मईया के मूर्ति दिव्य रूप म विराजमान हे, जेखर अनुपम छवि देखत ही बनथे।

रतनपुर के गिरजा म स्थापित श्री हनुमान मंदिर जिंहा आज चैत्र पूर्णिमा म हनुमान जन्मोत्सव महापर्व के धूम मचे हुए हे, आज पूरा नगर म हनुमान भक्त मन के आस्था ह पूरा उफान म हे, अउ ये पर्व ल बड़ ही भावभक्ति अउ धूमधाम ले मनाय जावत हे, जेमा पूरा नगर म जगह जगह हनुमान चालीसा के पाठ अउ जय श्री राम के जयकारा ले गूंजत हे, पूरा नगर ह हनुमान मय हो गए हे, जिंहा आज ये मंदिर म बिहानिहा ले लेके संझा बेरा तक भक्त मन के सैलाब के उमड़ पड़े रहिस, अउ इहाँ यज्ञ अनुष्ठान जारी हे,ये संदर्भ म अइसे बताय जाथे के ये मंदिर म हनुमान जन्मोत्सव मनाय के शुरुआत सन 1978 म अध्यापक भरत लाल पांडे के द्वारा ये परंपरा के शुरुआत करे गए रहिस, जिंहा तब से लेके आज तक लगातार लगभग 43 बछर पूरा हो चुके हे, पुरा श्रद्धा भक्ति के संग हनुमान जन्मोत्सव मनाय जावत हे। 

रतनपुर के गिरजावन स्थित दक्षिण मुखी हनुमान मंदिर जेखर कीर्ति गाथा संपूर्ण विश्व म फ़इल चुके हे अउ जेन ह अपन भक्त मन के मनोकामना ल शीघ्र ही पूरा करईया हे, जेखर अनुभव भक्तगण सच्चा मन ले ईहां एक बार आके कर सकत हे।